night-club

na.ī tahzīb ke shahkār-e-azīm!

terī pur-kaif o tarab-ḳhez fazāoñ ko salām!

kitne nau-ḳhez o hasīñ jism yahāñ chāroñ taraf

raqs meñ mahv haiñ uryānī kī tasvīr bane

apnī ra.anā.ī o zebā.ī kī tash.hīr bane

sāz-e-pur-josh kī sañgat meñ thirakte joḌe

farsh-e-marmar pe phisalte haiñ bahak jaate haiñ

dauḌtī jaatī hai rag rag meñ sharāb-e-gulfām

na.ī tahzīb ke shahkār-e-azīm!

terī pur-kaif o tarab-ḳhez fazāoñ ko salām!

un kī āñkhoñ se chhalaktī hai havas kī mastī

un ke sīnoñ meñ farozāñ haiñ vo jinsī sho.ale

jin kī ik ek lapaT se hai bhasam sharm-o-hayā

qahqahe, saaz kī tānoñ meñ Dhale jaate haiñ

lams kī aag meñ sab jism jale jaate haiñ

aañkh ke Doroñ meñ poshīda haiñ mub.ham se payām

na.ī tahzīb ke shahkār-e-azīm!

terī pur-kaif o tarab-ḳhez fazāoñ ko salām

dhaḌkaneñ tez huiiñ shauq kī lai baḌhne lagī

jism par tañgī-e-malbūs zarā aur baḌhī

aañkh meñ nashshe kī ik lahr zarā aur chaḌhī

larzish-e-pā se jhalakne lagī dil kī laġhzish!

daf.atan jaaz kī pur-josh sadā band huī

raushnī Duub ga.ī phail ga.ī zulmat-e-shab....

jism se jism kī qurbat jo bujhāne lagī aag

dopahar Dhal ga.ī jazbāt kī hone lagī shaam

na.ī tahzīb ke shahkār-e-azīm!

terī pur-kaif o tarab-ḳhez fazāoñ ko salām

jal gayā sīna-e-sozāñ meñ hī insāñ kā zamīr

ruuh kī chīḳh fazāoñ meñ kahīñ Duub ga.ī

ruḳh-e-tahzīb pasīne meñ sharābor huā

ilm hai sar-ba-garebāñ o adab mohr-ba-lab

kis se is daur-e-jarāhat meñ ho marham kī talab

mulk-e-tahzīb meñ chañgez hai phir ḳhūñ-āshām

na.ī tahzīb ke shahkār-e-azīm!

terī pur-kaif o tarab-ḳhez fazāoñ ko salām

nai tahzib ke shahkar-e-azim!

teri pur-kaif o tarab-KHez fazaon ko salam!

kitne nau-KHez o hasin jism yahan chaaron taraf

raqs mein mahw hain uryani ki taswir bane

apni ranai o zebai ki tashhir bane

saz-e-pur-josh ki sangat mein thirakte joDe

farsh-e-marmar pe phisalte hain bahak jate hain

dauDti jati hai rag rag mein sharab-e-gulfam

nai tahzib ke shahkar-e-azim!

teri pur-kaif o tarab-KHez fazaon ko salam!

un ki aankhon se chhalakti hai hawas ki masti

un ke sinon mein farozan hain wo jinsi shoale

jin ki ek ek lapaT se hai bhasam sharm-o-haya

qahqahe, saz ki tanon mein Dhale jate hain

lams ki aag mein sab jism jale jate hain

aankh ke Doron mein poshida hain mubham se payam

nai tahzib ke shahkar-e-azim!

teri pur-kaif o tarab-KHez fazaon ko salam

dhaDkanen tez huin shauq ki lai baDhne lagi

jism par tangi-e-malbus zara aur baDhi

aankh mein nashshe ki ek lahr zara aur chaDhi

larzish-e-pa se jhalakne lagi dil ki laghzish!

dafatan jaz ki pur-josh sada band hui

raushni Dub gai phail gai zulmat-e-shab

jism se jism ki qurbat jo bujhane lagi aag

dopahar Dhal gai jazbaat ki hone lagi sham

nai tahzib ke shahkar-e-azim!

teri pur-kaif o tarab-KHez fazaon ko salam

jal gaya sina-e-sozan mein hi insan ka zamir

ruh ki chiKH fazaon mein kahin Dub gai

ruKH-e-tahzib pasine mein sharabor hua

ilm hai sar-ba-gareban o adab mohr-ba-lab

kis se is daur-e-jarahat mein ho marham ki talab

mulk-e-tahzib mein changez hai phir KHun-asham

nai tahzib ke shahkar-e-azim!

teri pur-kaif o tarab-KHez fazaon ko salam