nisbat-e-KHak

zamīñ se kyuuñ na mujhe pyaar ho ki merā vajūd

azal se tā-ba-abad ḳhaak se ibārat hai

mirā ḳhayāl mire ḳhvāb merī fikr-o-nazar

jasad se tā-ba-lahad ḳhaak se ibārat hai

vo musht-e-ḳhāk jise nuur ne kiyā sajda

ḳhirad ke nit na.e sāñchoñ meñ Dhal rahī hai aaj

vo aag jis ne kiyā inhirāf-e-azmat-e-ḳhāk

ḳhud apnī zaat ke dozaḳh meñ jal rahī hai aaj

maiñ apnī ḳhaak se kis tarah be-niyāz rahūñ

mirī zamīñ mujhe jannat dikhā.ī detī hai

vo guftugū jo sar-e-arsh mere haq meñ huī

ḳhudā ke lahje meñ ab bhī sunā.ī detī hai

maiñ apnī ḳhaak vatan se jo pyaar kartā huuñ

to is liye ki mujhe us se ḳhaas nisbat hai

mire vajūd kī azmat mirā urūj-o-zavāl

azal se tā-ba-abad ḳhaak se ibārat hai

zamin se kyun na mujhe pyar ho ki mera wajud

azal se ta-ba-abad KHak se ibarat hai

mera KHayal mere KHwab meri fikr-o-nazar

jasad se ta-ba-lahad KHak se ibarat hai

wo musht-e-KHak jise nur ne kiya sajda

KHirad ke nit nae sanchon mein Dhal rahi hai aaj

wo aag jis ne kiya inhiraf-e-azmat-e-KHak

KHud apni zat ke dozaKH mein jal rahi hai aaj

main apni KHak se kis tarah be-niyaz rahun

meri zamin mujhe jannat dikhai deti hai

wo guftugu jo sar-e-arsh mere haq mein hui

KHuda ke lahje mein ab bhi sunai deti hai

main apni KHak watan se jo pyar karta hun

to is liye ki mujhe us se KHas nisbat hai

mere wajud ki azmat mera uruj-o-zawal

azal se ta-ba-abad KHak se ibarat hai