nuh ke baad

nuqta-e-sifr par vaqt kā paañv thā

zad meñ sailāb kī jab har ik gaañv thā

nuuh ne apnī kashtī ko taḳhlīq kī

jumla anvā.a se bhar liyā

rub.a maskoñ ke sailāb par apnī kashtī liye

koh-e-jūdī kī choTī ko sar kar liyā

nuuh ke vāste jis parinde kī minqār meñ

barg-e-zaitūn thā

vo umīd-e-musalsal kā qānūn thā

ham jo kashtī se aur barg-e-zaitūn se

koh-e-jūdī se mahrūm haiñ

mubtalā ham ko is imtihāñ meñ kyā kis liye

itnī lāshoñ makānoñ ke malboñ

ukhaḌte daraḳhtoñ sisakte parindoñ

shikasta badan revḌoñ ko

kahāñ le ke jaa.eñ

ham to sailāb se qabl bhī

mustaqil ek sailāb kī zad meñ haiñ

bhuuk iflās bīmāriyāñ

zulm nādāriyāñ

bad-diyānat shaboñ kī siyah-kāriyāñ

ek pur-haul sailāb se kam nahīñ

gardish-e-roz-o-shab se nikalte hue

nuuh ne raah paalī thī jiine kī ḳhātir

aur tūfān bhī ruk gayā thā safīne kī ḳhātir

ab hamāre liye koī murkkab nahīñ

koī kashtī nahīñ

jis ke bal par kahīñ paar utar jaa.eñ ham

nuqta-e-sifr par vaqt ke paañv kī tarah

ik pal Thahar jaa.eñ ham

jab ye kuchh bhī mayassar nahīñ hai to phir

ham ko fitrat ke qānūn ab āzmāte haiñ kyuuñ

nuuh ke ba.ad tūfān aate haiñ kyuuñ

nuqta-e-sifr par waqt ka panw tha

zad mein sailab ki jab har ek ganw tha

nuh ne apni kashti ko taKHliq ki

jumla anwaa se bhar liya

ruba maskon ke sailab par apni kashti liye

koh-e-judi ki choTi ko sar kar liya

nuh ke waste jis parinde ki minqar mein

barg-e-zaitun tha

wo umid-e-musalsal ka qanun tha

hum jo kashti se aur barg-e-zaitun se

koh-e-judi se mahrum hain

mubtala hum ko is imtihan mein kya kis liye

itni lashon makanon ke malbon

ukhaDte daraKHton sisakte parindon

shikasta badan rewDon ko

kahan le ke jaen

hum to sailab se qabl bhi

mustaqil ek sailab ki zad mein hain

bhuk iflas bimariyan

zulm nadariyan

bad-diyanat shabon ki siyah-kariyan

ek pur-haul sailab se kam nahin

gardish-e-roz-o-shab se nikalte hue

nuh ne rah pali thi jine ki KHatir

aur tufan bhi ruk gaya tha safine ki KHatir

ab hamare liye koi murkkab nahin

koi kashti nahin

jis ke bal par kahin par utar jaen hum

nuqta-e-sifr par waqt ke panw ki tarah

ek pal Thahar jaen hum

jab ye kuchh bhi mayassar nahin hai to phir

hum ko fitrat ke qanun ab aazmate hain kyun

nuh ke baad tufan aate hain kyun