paigham-e-wafa

terī āñkhoñ meñ jhalaktā huā paiġhām-e-vafā

sochtā huuñ ki koī ḳhvāb-e-pareshāñ to nahīñ

ye tabassum ye tavajjoh ye taqāzā-e-nazar

merī barbādī-e-dil kā kahīñ sāmāñ to nahīñ

terī pur-shauq nigāhoñ kā ye rangīn payām

kyā ḳhabar hai kisī uftād kā paiġhām na ho

maiñ ne samjhā hai jise apne liye hī maḳhsūs

vo taqāzā tirī nazroñ kā kahīñ 'aam na ho

ḳhair maanā na sahī 'aam tirā 'ahd-e-vafā

phir bhī ye sham' tire dil meñ farozāñ kyoñ hai

terā ye lutf-o-karam terā ye andāz-e-nazar

saḳht hairāñ huuñ ki mere liye arzāñ kyoñ hai

rishta-e-mehr-o-vafā ek hasīñ ḳhvāb sahī

lekin is ḳhvāb kī tā'bīr se Dar lagtā hai

ye vafā maslahat-andesh bhī ho saktī hai

is chamaktī huī zanjīr se Dar lagtā hai

merī ḳhvābīda umangoñ ko jagāne vaalī

terī vārafta nigāhoñ kā yaqīñ to kar luuñ

apne altāf kā mafhūm samajh lene de

maiñ zarā tajziya-e-'ahd-e-hasīñ to kar luuñ

teri aankhon mein jhalakta hua paigham-e-wafa

sochta hun ki koi KHwab-e-pareshan to nahin

ye tabassum ye tawajjoh ye taqaza-e-nazar

meri barbaadi-e-dil ka kahin saman to nahin

teri pur-shauq nigahon ka ye rangin payam

kya KHabar hai kisi uftad ka paigham na ho

main ne samjha hai jise apne liye hi maKHsus

wo taqaza teri nazron ka kahin 'am na ho

KHair mana na sahi 'am tera 'ahd-e-wafa

phir bhi ye sham' tere dil mein farozan kyon hai

tera ye lutf-o-karam tera ye andaz-e-nazar

saKHt hairan hun ki mere liye arzan kyon hai

rishta-e-mehr-o-wafa ek hasin KHwab sahi

lekin is KHwab ki ta'bir se Dar lagta hai

ye wafa maslahat-andesh bhi ho sakti hai

is chamakti hui zanjir se Dar lagta hai

meri KHwabida umangon ko jagane wali

teri warafta nigahon ka yaqin to kar lun

apne altaf ka mafhum samajh lene de

main zara tajziya-e-'ahd-e-hasin to kar lun