parindon ki boli

bahut din hue

ek tālāb ke paas maiñ ne parindoñ ko dekhā

falak par bhaTakte hue chand bādal the

aur sub.h kī dhuup meñ halkī halkī sī ThanDak

vahāñ gahre tālāb ke paas ūñche daraḳhtoñ kī is oT meñ

dhuup kī ThanDī ThanDī sī kirnoñ se lipTe hue sabz patte

daraḳhtoñ se tālāb meñ gir rahe the

vahīñ maiñ ne dekhā ki duniyā ke saare parinde

na jaane kahāñ se zamānoñ ke phaile hue fāsloñ se

ubharte haiñ tālāb ke paas aa kar utarte haiñ aur bolte haiñ

vahīñ maiñ ne un sab parindoñ ko ūñche daraḳhtoñ pe niilī fazāoñ meñ tālāb ke pāniyoñ par kināroñ pe har samt dekhā

vo uḌte hue hans gaatī huī bulbuleñ mor sadiyoñ ke qāsid kabūtar

vo aise parinde bhī jo apne nāmoñ ko bas aap hī jānte haiñ

vo nādir sadā.eñ ki jaise vo sadiyoñ ke asrār ko kholtī huuñ

vo chahkār jaise vo an-dekhī duniyāoñ se aa rahī ho

parindoñ kī bolī ke asrār ko sīkhte din kaTā raat guzrī

bahāreñ ḳhizā.eñ palaT kar ka.ī baar aa.iiñ

bahut din hue maiñ ne jab un parindoñ ko dekhā

aur ab un kī ġhaibī sadāoñ ke asrār ko chār-sū dekhtā huuñ

mujhe ilm hai har sadā duur se aane vaalī sadā hai

har ik shai meñ koī ishārat nihāñ hai

bahut din hue

ek talab ke pas main ne parindon ko dekha

falak par bhaTakte hue chand baadal the

aur subh ki dhup mein halki halki si ThanDak

wahan gahre talab ke pas unche daraKHton ki is oT mein

dhup ki ThanDi ThanDi si kirnon se lipTe hue sabz patte

daraKHton se talab mein gir rahe the

wahin main ne dekha ki duniya ke sare parinde

na jaane kahan se zamanon ke phaile hue faslon se

ubharte hain talab ke pas aa kar utarte hain aur bolte hain

wahin main ne un sab parindon ko unche daraKHton pe nili fazaon mein talab ke paniyon par kinaron pe har samt dekha

wo uDte hue hans gati hui bulbulen mor sadiyon ke qasid kabutar

wo aise parinde bhi jo apne namon ko bas aap hi jaante hain

wo nadir sadaen ki jaise wo sadiyon ke asrar ko kholti hun

wo chahkar jaise wo an-dekhi duniyaon se aa rahi ho

parindon ki boli ke asrar ko sikhte din kaTa raat guzri

bahaaren KHizaen palaT kar kai bar aain

bahut din hue main ne jab un parindon ko dekha

aur ab un ki ghaibi sadaon ke asrar ko chaar-su dekhta hun

mujhe ilm hai har sada dur se aane wali sada hai

har ek shai mein koi ishaarat nihan hai