پرندوں کی دنیا

ہم اپنے دلوں کا تجسس مٹائیں

پرندوں کی دنیا چلو دیکھ آئیں

یہ چھوٹے بڑے پیارے پیارے پرندے

دکھاتے ہیں کیسے نظارے پرندے

اڑیں آسمانوں میں دن رات ہم بھی

یہی دے رہے ہیں اشارے پرندے

یوں دوری زمیں سے فلک کی مٹائیں

پرندوں کی دنیا چلو دیکھ آئیں

ہمیں دیکھنا ہے وہ رہتے ہیں کیسے

کوئی بات دل کی وہ کہتے ہیں کیسے

جو بیمار پڑتے ہیں جب بھی کبھی وہ

غم و درد اس کا وہ سہتے ہیں کیسے

اگر ہو سکے ان کے ہم کام آئیں

پرندوں کی دنیا چلو دیکھ آئیں

وہ اک ساتھ اڑنا وہ مل جل کے رہنا

وہ پیڑوں پہ ان کا پھدکنا چہکنا

نہ دھن کی تمنا نہ دولت کی خواہش

نہ آپس میں ان کا کبھی بھی الجھنا

وہاں سے یہی خوبیاں ڈھونڈ لائیں

پرندوں کی دنیا چلو دیکھ آئیں

زباں پر نہ گالی نہ شکوہ گلہ ہے

یہ انداز ان کا بھی کتنا بھلا ہے

خدا کی بڑائی ہے ہونٹوں پہ ان کے

ازل سے ابھی تک یہی سلسلہ ہے

سنیں اور نغمہ یہ ہم سب بھی گائیں

پرندوں کی دنیا چلو دیکھ آئیں

خدایا ہمیں بھی یہ خوبی عطا کر

رہیں ہم بھی دل سے کدورت مٹا کر

ہمیں بھی کسی سے نہ بغض و حسد ہو

ان امراض کی تو ہمارے دوا کر

تری نعمتوں کو نہ ہرگز بھلائیں

پرندوں کی دنیا چلو دیکھ آئیں