جواہر لال نہرو

ساحر لدھیانوی

جواہر لال نہرو

ساحر لدھیانوی

MORE BYساحر لدھیانوی

    جسم کی موت کوئی موت نہیں ہوتی ہے

    جسم مٹ جانے سے انسان نہیں مر جاتے

    دھڑکنیں رکنے سے ارمان نہیں مر جاتے

    سانس تھم جانے سے اعلان نہیں مر جاتے

    ہونٹ جم جانے سے فرمان نہیں مر جاتے

    جسم کی موت کوئی موت نہیں ہوتی ہے

    وہ جو ہر دین سے منکر تھا ہر اک دھرم سے دور

    پھر بھی ہر دین ہر اک دھرم کا غم خوار رہا

    ساری قوموں کے گناہوں کا کڑا بوجھ لئے

    عمر بھر صورت عیسیٰ جو سر دار رہا

    جس نے انسانوں کی تقسیم کے صدمے جھیلے

    پھر بھی انساں کی اخوت کا پرستار رہا

    جس کی نظروں میں تھا اک عالمی تہذیب کا خواب

    جس کا ہر سانس نئے عہد کا معمار رہا

    جس نے زردار معیشت کو گوارا نہ کیا

    جس کو آئین مساوات پہ اصرار رہا

    اس کے فرمانوں کی اعلانوں کی تعظیم کرو

    راکھ تقسیم کی ارمان بھی تقسیم کرو

    موت اور زیست کے سنگم پہ پریشاں کیوں ہو

    اس کا بخشا ہوا سہ رنگ علم لے کے چلو

    جو تمہیں جادۂ منزل کا پتہ دیتا ہے

    اپنی پیشانی پر وہ نقش قدم لے کے چلو

    دامن وقت پہ اب خون کے چھینٹے نہ پڑیں

    ایک مرکز کی طرف دیر و حرم لے کے چلو

    ہم مٹا ڈالیں گے سرمایہ و محنت کا تضاد

    یہ عقیدہ یہ ارادہ یہ قسم لے کے چلو

    وہ جو ہم راز رہا حاضر و مستقبل کا

    اس کے خوابوں کی خوشی روح کا غم لے کے چلو

    جسم کی موت کوئی موت نہیں ہوتی ہے

    جسم مٹ جانے سے انسان نہیں مر جاتے

    دھڑکنیں رکنے سے ارمان نہیں مر جاتے

    سانس تھم جانے سے اعلان نہیں مر جاتے

    ہونٹ جم جانے سے فرمان نہیں مر جاتے

    جسم کی موت کوئی موت نہیں ہوتی ہے

    مأخذ :
    • کتاب : Kulliyat-e-Sahir Ludhianvi (Pg. 207)
    • Author : SAHIR LUDHIANVI
    • مطبع : Farid Book Depot (Pvt.) Ltd

    موضوعات

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY
    بولیے