pyara watan hamara

larzā thā jis ke bachchoñ kā naam sun ke aalam

hotā thā jin ke aage sheroñ kā ḳhatm dam-ḳham

jin kā uḌā hamesha arsh-e-barīñ pe parcham

azmat kā jin kī Dañkā bajtā rahegā daa.im

hindostāñ vahī hai pyārā vatan hamārā

jis mulk meñ karoḌoñ be-misl the dilāvar

lākhoñ the bhiim arjun balrām shyām 'raghubar'

the tiir jin ke zevar bistar the jin ke ḳhanjar

rū-e-zamīñ pe jin kā paidā huā na ham-sar

hindostāñ vahī hai pyārā vatan hamārā

jis mulk par thā nāzāñ akbar sā shāh-e-āzam

uḌtā thā āsmāñ par shohrat kā jis kī parcham

thā adl kā zamāna insāf kā thā aalam

'hindū' musalmāñ donoñ rahte the mil ke bāham

hindostāñ vahī hai pyārā vatan hamārā

the kālīdās jaise jis desh meñ suḳhnavar

kyā chiiz un ke aage europe kā shakespeare

pāmāl ho chukā hai vo gulistāñ sarāsar

is ġhair-hāl meñ bhī hai kul jahāñ se behtar

hindostāñ vahī hai pyārā vatan hamārā

'gautam' se ilm-dāñ ko jis ne janam diyā thā

'mīrāñ' ne jis zamīñ par ḳhush ho ke sam piyā thā

'pātanjalī' ko paidā jis mulk ne kiyā thā

aalam ne falsafe kā jin se sabaq liyā thā

hindostāñ vahī hai pyārā vatan hamārā

godī meñ jis kī ab tak gaamā sā pahlvāñ hai

nazroñ meñ kal jahāñ kī jo rustam-e-zamāñ hai

tāqat kā jis kī qaa.il har piir aur javāñ hai

vo saiñkaḌoñ javānoñ pe aaj tak garāñ hai

hindostāñ vahī hai pyārā vatan hamārā

vo koh-e-nūr hiirā jis ne kiyā thā paidā

jis kī chamak se aksar shāhoñ kā taaj chamkā

hīroñ meñ kul jahāñ ke maanā gayā hai yaktā

mumkin nahīñ abad tak jis kā javāb milnā

hindostāñ vahī hai pyārā vatan hamārā

tagore se jahāñ huuñ shā.ir bhī aur hunar-var

jis kī zamīñ pe ab tak 'gāñdhī' hai aur javāhar

'abul-kalām' jaise jis mulk meñ hoñ leader

azmat kā jin kī sikka hai kul jahāñ ke dil par

hindostāñ vahī hai pyārā vatan hamārā

raanā ne jis zamīñ par kī teġh āzmā.ī

jis mulk par hazāroñ vīroñ ne jaañ gañvā.ī

sahrā meñ jis ke mohan ne bāñsurī bajā.ī

murda diloñ meñ ulfat kī aag sī lagā.ī

hindostāñ vahī hai pyārā vatan hamārā

jis mulk meñ thiiñ lākhoñ siitā sī pāk-dāman

teġhoñ ke saa.e meñ jo kartī thī dharm-pālan

shādāb ho rahā thā ismat kā jin se gulshan

qaa.il haiñ jin kī ismat ke dost aur dushman

hindostāñ vahī hai pyārā vatan hamārā

zarḳhez mulk koī jis ke nahīñ barābar

roz-e-azal se ab tak sarsabz hai sarāsar

kānoñ meñ aaj tak bhī jis ke haiñ siim aur zar

jis kī zamīñ ugaltī hai la.al aur javāhar

hindostāñ vahī hai pyārā vatan hamārā

larza tha jis ke bachchon ka nam sun ke aalam

hota tha jin ke aage sheron ka KHatm dam-KHam

jin ka uDa hamesha arsh-e-barin pe parcham

azmat ka jin ki Danka bajta rahega daim

hindostan wahi hai pyara watan hamara

jis mulk mein karoDon be-misl the dilawar

lakhon the bhim arjun balram shyam 'raghubar'

the tir jin ke zewar bistar the jin ke KHanjar

ru-e-zamin pe jin ka paida hua na ham-sar

hindostan wahi hai pyara watan hamara

jis mulk par tha nazan akbar sa shah-e-azam

uDta tha aasman par shohrat ka jis ki parcham

tha adl ka zamana insaf ka tha aalam

'hindu' musalman donon rahte the mil ke baham

hindostan wahi hai pyara watan hamara

the kalidas jaise jis desh mein suKHnawar

kya chiz un ke aage europe ka shakespeare

pamal ho chuka hai wo gulistan sarasar

is ghair-haal mein bhi hai kul jahan se behtar

hindostan wahi hai pyara watan hamara

'gautam' se ilm-dan ko jis ne janam diya tha

'miran' ne jis zamin par KHush ho ke sam piya tha

'patanjali' ko paida jis mulk ne kiya tha

aalam ne falsafe ka jin se sabaq liya tha

hindostan wahi hai pyara watan hamara

godi mein jis ki ab tak gama sa pahlwan hai

nazron mein kal jahan ki jo rustam-e-zaman hai

taqat ka jis ki qail har pir aur jawan hai

wo sainkaDon jawanon pe aaj tak garan hai

hindostan wahi hai pyara watan hamara

wo koh-e-nur hira jis ne kiya tha paida

jis ki chamak se aksar shahon ka taj chamka

hiron mein kul jahan ke mana gaya hai yakta

mumkin nahin abad tak jis ka jawab milna

hindostan wahi hai pyara watan hamara

tagore se jahan hun shair bhi aur hunar-war

jis ki zamin pe ab tak 'gandhi' hai aur jawahar

'abul-kalam' jaise jis mulk mein hon leader

azmat ka jin ki sikka hai kul jahan ke dil par

hindostan wahi hai pyara watan hamara

rana ne jis zamin par ki tegh aazmai

jis mulk par hazaron wiron ne jaan ganwai

sahra mein jis ke mohan ne bansuri bajai

murda dilon mein ulfat ki aag si lagai

hindostan wahi hai pyara watan hamara

jis mulk mein thin lakhon sita si pak-daman

teghon ke sae mein jo karti thi dharm-palan

shadab ho raha tha ismat ka jin se gulshan

qail hain jin ki ismat ke dost aur dushman

hindostan wahi hai pyara watan hamara

zarKHez mulk koi jis ke nahin barabar

roz-e-azal se ab tak sarsabz hai sarasar

kanon mein aaj tak bhi jis ke hain sim aur zar

jis ki zamin ugalti hai lal aur jawahar

hindostan wahi hai pyara watan hamara