qanun-e-qudrat

jab bhī is mulk pe aafat kī ghaḌī aa.ī hai

āzmā.ish koī jis vaqt kaḌī aa.ī hai

jab hameñ an-ginat āfāt se Dar lagtā ho

aur bigḌe hue hālāt se Dar lagtā ho

ġham-o-ālām kī pur-haul ghaTā chhā jaa.e

sar pe mañDlāte hoñ ḳhatrāt ke gahre saa.e

jab ghaTā-Top añdhere meñ qadam chal na sakeñ

aur jab jāda-e-pur-ḳhār pe ham chal na sakeñ

duur tak jab kahīñ manzil kā patā bhī na mile

ham-safar bhī na mile rāh-numā bhī na mile

kuchh añdhere meñ sujhā.ī na kahīñ detā ho

haath par haath dikhā.ī na kahīñ detā ho

qāfila qaum kā jis vaqt bhaTak jaatā ho

aur pur-haul añdheroñ meñ aTak jaatā ho

qāfile vāloñ ke qadmoñ kī sadā bhī gum ho

ek sannāTā ho aur bāñg-e-darā bhī gum ho

ādamiyat se agar apnā yaqīñ uTh jaa.e

aur nairañgi-e-hālāt pe dil tharrā.e

guñg jazbāt ko jis vaqt zabāñ bhī na mile

nāla-e-dil ko koī tarz-e-fuġhāñ bhī na mile

ruuh meñ karb ho betābi-o-be-zārī ho

aur māhaul pe dahshat sī ajab taarī ho

zahr-e-ġham qaum kī rag rag meñ asar kar jaa.e

be-hisī zehn meñ har shaḳhs ke ghar kar jaa.e

al-ġharaz zindagī-e-qaum meñ aa jaa.e jumūd

aur paḌ jaa.e jab is mulk kā ḳhatre meñ vajūd

ain us vaqt koī rāh-numā aatā hai

aa ke bigḌe hue hālāt banā jaatā hai

jab bhi is mulk pe aafat ki ghaDi aai hai

aazmaish koi jis waqt kaDi aai hai

jab hamein an-ginat aafat se Dar lagta ho

aur bigDe hue haalat se Dar lagta ho

gham-o-alam ki pur-haul ghaTa chha jae

sar pe manDlate hon KHatraat ke gahre sae

jab ghaTa-Top andhere mein qadam chal na saken

aur jab jada-e-pur-KHar pe hum chal na saken

dur tak jab kahin manzil ka pata bhi na mile

ham-safar bhi na mile rah-numa bhi na mile

kuchh andhere mein sujhai na kahin deta ho

hath par hath dikhai na kahin deta ho

qafila qaum ka jis waqt bhaTak jata ho

aur pur-haul andheron mein aTak jata ho

qafile walon ke qadmon ki sada bhi gum ho

ek sannaTa ho aur bang-e-dara bhi gum ho

aadamiyat se agar apna yaqin uTh jae

aur nairangi-e-haalat pe dil tharrae

gung jazbaat ko jis waqt zaban bhi na mile

nala-e-dil ko koi tarz-e-fughan bhi na mile

ruh mein karb ho betabi-o-be-zari ho

aur mahaul pe dahshat si ajab tari ho

zahr-e-gham qaum ki rag rag mein asar kar jae

be-hisi zehn mein har shaKHs ke ghar kar jae

al-gharaz zindagi-e-qaum mein aa jae jumud

aur paD jae jab is mulk ka KHatre mein wajud

ain us waqt koi rah-numa aata hai

aa ke bigDe hue haalat bana jata hai