qaht

maiñ apne band kamre meñ paḌā huuñ

ki raushnī bhī ujāloñ kī muntazir hai

vo kone meñ lagā jaalā bhī thak gayā hai

niilī dīvāreñ jo ummīd kā ik zāviya banātī thiiñ

ḳhud ko parde se chhupātī haiñ

ki khiḌkī se nazar aatā

bārish kā ḳhūbsūrat manzar

mahzūz kun thā

calender ke palaTne par

ab ram nazm bhī sunā.ī nahīñ detī

magar khiḌkī par rasta banātā huā paanī

vo bhī be-tāb hai ki jhāñk le andar

ki pahroñ kaun hai jo chup kī sham.a jalā.e

khiḌkī par paḌe paanī ke qatroñ ko

muqaddas se muqaddas jāntā hai

ki ek ek qatra aañsū se shabīh hai

ki barse to bahut barse vagarna qaht vājib hai

main apne band kamre mein paDa hun

ki raushni bhi ujalon ki muntazir hai

wo kone mein laga jala bhi thak gaya hai

nili diwaren jo ummid ka ek zawiya banati thin

KHud ko parde se chhupati hain

ki khiDki se nazar aata

barish ka KHubsurat manzar

mahzuz kun tha

calender ke palaTne par

ab ram nazm bhi sunai nahin deti

magar khiDki par rasta banata hua pani

wo bhi be-tab hai ki jhank le andar

ki pahron kaun hai jo chup ki shama jalae

khiDki par paDe pani ke qatron ko

muqaddas se muqaddas jaanta hai

ki ek ek qatra aansu se shabih hai

ki barse to bahut barse wagarna qaht wajib hai