qarya-e-viran

jhulse peḌ jalī ābādī khetī sūkhī ḳhirman raakh

hast-o-būd kā madfan raakh

girte bām-o-dar ke liye galiyoñ kā āġhosh

jaise ye dīvāroñ ko the kab se vabāl-e-dosh

baar haTā to aayā hosh

panghaT aur chaupāl bhī suune rāheñ bhī sunsān

galiyāñ aur kūche vīrān

jhoñke sūkhe patte roleñ bikhrī raakh uḌā.īñ

raakh aur patte ban ke bagūle apnā naach dikhā.eñ

aur vahīñ rah jaa.eñ

ye bastī ab toḌ chukī hai hastī kī zanjīr-e-girāñ

aur quyūd-e-zamān-o-makāñ

vaqt ke Daaku chakkar us ko bisāt mutābiq luuT chuke

us ke liye māhaul-o-fizā ke saare bandhan TuuT chuke

māzī-o-hāl bhī chhūT chuke

kaun aa.e jo aa kar is meñ ziist ke rañg bhare

khetoñ ko sarsabz kare

galī galī aur kūcha kūcha panghaT aur chaupāl

khelte bachchoñ hañstī javānī se kar de choñchāl

zinda kar de māzī-o-hāl

jhulse peD jali aabaadi kheti sukhi KHirman rakh

hast-o-bud ka madfan rakh

girte baam-o-dar ke liye galiyon ka aaghosh

jaise ye diwaron ko the kab se wabaal-e-dosh

bar haTa to aaya hosh

panghaT aur chaupal bhi sune rahen bhi sunsan

galiyan aur kuche viran

jhonke sukhe patte rolen bikhri rakh uDain

rakh aur patte ban ke bagule apna nach dikhaen

aur wahin rah jaen

ye basti ab toD chuki hai hasti ki zanjir-e-giran

aur quyud-e-zaman-o-makan

waqt ke Daku chakkar us ko bisat mutabiq luT chuke

us ke liye mahaul-o-fiza ke sare bandhan TuT chuke

mazi-o-haal bhi chhuT chuke

kaun aae jo aa kar is mein zist ke rang bhare

kheton ko sarsabz kare

gali gali aur kucha kucha panghaT aur chaupal

khelte bachchon hansti jawani se kar de chonchaal

zinda kar de mazi-o-haal