qubuliyat se do hath ki duri par

maiñ shahr ke navāhī shor meñ rahtā huuñ

rozāna manoñ ke hisāb se

ḳhāmoshī kā severage

mere ghar ke sāmne paḌāv Dāltā hai

jis meñ an-kahī bātoñ ke chhilke

nauzā.ida taklīfoñ ke wrappers

aur chīḳhtī shāmoñ kī ḳhālī botaleñ

badbū-dār gāliyoñ ko janm detī haiñ

maiñ apnī āvāz kā nikās chāhtā huuñ

lafz agar barsāt se pahle

qarībī samā.atoñ tak na pahuñcheñ

to zabānoñ ko dīmak lag jaatī hai

maiñ ne ḳhudā se guzārish kī hai

bādaloñ kī aamad se qabl

mujhe sūraj se milne diyā jaa.e

tā ki harārat jauhaḌoñ ko ḳhushk karne meñ muāvin ho

magar municipal committē ke daftar meñ

baiThne vaale farishte

chhuTTiyoñ par haiñ

shahr mujh se do haath kī duurī par hai

lekin mere paas loudspeaker nahīñ

so maiñ us chīḳham dhaaḌ ke manzar-nāme par

apnī jagah nahīñ banā saktā

agar ye mas.ala kuchh arse tak yūñhī rahā

to majbūran mujhe kashtī daryāft karnā hogī

jise dariyā ne dhutkār diyā ho

magar maiñ nāḳhudā nahīñ huuñ

zindagī mujh se kis qadar mazāq kartī hai

bhalā do haath kī duurī kitnī der meñ tai hotī hai

mehrbān sā.atoñ kā intizār mujhe

qubūliyat se duur kyoñ rakhtā hai

main shahr ke nawahi shor mein rahta hun

rozana manon ke hisab se

KHamoshi ka sewerage

mere ghar ke samne paDaw Dalta hai

jis mein an-kahi baaton ke chhilke

nauzaida taklifon ke wrappers

aur chiKHti shamon ki KHali botalen

badbu-dar galiyon ko janm deti hain

main apni aawaz ka nikas chahta hun

lafz agar barsat se pahle

qaribi samaaton tak na pahunchen

to zabanon ko dimak lag jati hai

main ne KHuda se guzarish ki hai

baadalon ki aamad se qabl

mujhe suraj se milne diya jae

ta ki hararat jauhaDon ko KHushk karne mein muawin ho

magar municipal committee ke daftar mein

baiThne wale farishte

chhuTTiyon par hain

shahr mujh se do hath ki duri par hai

lekin mere pas loudspeaker nahin

so main us chiKHam dhaD ke manzar-name par

apni jagah nahin bana sakta

agar ye masala kuchh arse tak yunhi raha

to majburan mujhe kashti daryaft karna hogi

jise dariya ne dhutkar diya ho

magar main naKHuda nahin hun

zindagi mujh se kis qadar mazaq karti hai

bhala do hath ki duri kitni der mein tai hoti hai

mehrban saaton ka intizar mujhe

qubuliyat se dur kyon rakhta hai