راگ یگ کی نظمیں

باجا کبھی نہ تھمنے والا

شیون سوکھی پھلیوں کا

گرد آلود ہوا کے جھکڑ

اتنی اتھل پتھل جاری

سناٹا پھر بھی سناٹا

اک کھنچی کمان

وہ کب ٹوٹا کب پھوٹا

حاشیۂ دیوار کی صورت

ڈھیر سنہرا

پیلے سوکھے پتوں کا

چرمرا کرتا ضرر سے عاری

خاک میں رلتی چرمر اس کی سنتا ہوا

کھڑکی سے چپکا تھا کھڑا وہ بے پروا

ہر آہٹ کے ہر آواز کے ڈھانچے میں

رینگ رہا بیری بھیدی

گہنا اتنا پور پور سنہرا لادے

ٹہنی ٹہنی جوگن پیراگن

چپ کی داد کمانا چاہیں

سوم لتائیں

راگنیاں سب

کیا دیپک کیا میگھ

راگ یگ بیتا

کب بیتا راگ یگ

ترے گاؤں کی چھاؤں

تیرا سنگھاسن اڑن کھٹولا

کن ٹیلوں کے تلے

بچے کھیل رہے ہیں اپنا

شوریکار کا کھیل پرانا

راگ یگ کہے دھوپ جہاں

پیلی ہے تو کبھی دھانی

بہتا پانی

روئیدہ الجھاؤ

خس و خاشاک دھتورا ناگ پھنی

اور وہیں چمپا کی شاخ بھی

سرتابی سے پھولے پھلے

آہن تیز کڑی دھوپوں کا

اور بھی کچھ پگھلے

تپتا خون ہے پی جائے گا

سوم امرت کا یہ گھونٹ

لو چلتی رہی

قطرہ قطرہ پسینہ کب کا سوکھ چکا

تازہ دلی کے ہلکورے آنکھوں میں مگر

اب بھی باقی

دھول بھری پگڈنڈی بلکھاتی مڑتی ہے

رقص کناں ہے بگولے میں اک برگ سرخ

کوہستانی سلوں کے بیچ چمکتا پانی

اک جھاڑی سے اڑانیں بھرتی

بالا بالا پروں کی جھلمل

دوسری جھاڑی میں روپوش

اتنی سی اک بات اسی سے

سونا سونا دل کا افق

رنگ بھرا نیرنگ بھرا

جل میں ڈوبے عکس اڑے

تتلی کے پروں سے

وہ جل تھا

نرموہی

ہلچل سے جو باز رہا

دل تو نہ تھا

کب اس کی تھاہ میں جھلکا ہوا

دمکی دمکی ہن برساتی دھند کا اک پورب

تتلی کے پروں سے اڑ پایا

اک پکار سہانی تھی وہ

فاصلے شنوائی کے لے جس کو درکار

تب درد کی لو تیز ہوئی

میری اپنی سیما تھی

میرا اپنا دوش

اس سے نکلے سب جھگڑے دکھڑے

دنیا کہتی ہے ہم بھی

کہتے ہیں اپنی اپنی گاتھا کا اسے حرف آغاز

نافہ بہ نافہ خوشبو چھنتی رہی

سہج سبھاؤ میں اپنائیت کا رچاؤ رچاتی

مگر کسوٹی کے پتھر میں جب ڈھل جاتی

تب ٹکراؤ اٹل

تب سہنا گھاؤ پہ گھاؤ

مگر اف کہنا عار مگر

اف کہنا ہار

تب بربادی

تخت سلیماں تھا جیسے برباد رہا

اپنی خوشی سے کون اس کا

اپنی مرضی سے پڑاؤ

کہرا چھاؤنی چھانے آیا دیوگری پر

آناً‌ فاناً دیوگری

سر بہ فلک اک روئی کا ڈھیر

دھنکی بھی نداف کی پھرتیلی تھی

اور نداف بھی تیز

ایں ہم آں ہم دیں ہم جاں ہم

رفت ہی رفت کی دھن پر گالے اڑتے ہوئے

آندھی نے دیکھے آندھی کو ہانکے کی سوجھی

لیکن چھپے مزاحم وہ پیچ و خم کڑی چٹانوں کے

کب ہانکے گئے

کتنی بار ہوا ایسا

سلسلہ مست الست یہ قائم

نیلاہٹ کے عدم کے پس منظر سے ابھرتا

حیراں حیراں آنکھوں کو دکھلائی دیا

گھوم رہا ہے پروانہ

چکرایا بے صدا ہو کے گرا

پھر چاندی چاندی راکھ ہوا سمٹی

بکھرے بکھرے پر وہ جڑے

پھر بہکی بہکی اڑان بھری

ٹکراتا ہے فانوس سے

شمع تمنا

ٹکرانے دے اسے

آخر اس کا اپنا بھی اک

فانوس حباب آسا ہے خواب آسا

وہ جتنا چکنا چور اتنا ہی

نور ظہور کا عالم اس سے پھٹا پڑتا

کب ہو پائی یہ شکستگی پوری

مکتی

وہ شگفتگی پوری

یوں اک پل

جھونک دیا جاتا ہے اس میں

اب جب تب سے وارستہ

من مانا بہاؤ

تب تم بن دوجا بے ہمتا

کون اس کے جینے مرنے کا

پھر مر کر جی اٹھنے کا جواز

کل جگ کے پاس جگ کے کھیتوں سے پھوٹے

گیت رہٹ کا

سیرابی ہی اس کی لے

رت رت نیا رہے لوح و قلم تیرے

سرمد سرگم

کہاں اگم ترا کہاں اگم

تیرا سبوچہ گہوارہ ترا

ہر روز روشن

تجھ کو ساجے عالم عالم ہم آہنگی

لیکن اپنی ترنگ کے ساتھ

بن چڑیاں بے روک اڑانیں

بے بندش چہچہے

سنگت میں پوربی نوا کی

ہرے بھرے زمزمے

گھلی ملی ان میں اک کوک

مسلسل سہہ ضربی

دیتی ہے ان دیکھی کسی ہدہد چڑیا کا پتہ

یہ اپنی پہچان کی رت کے پکھیرو

اونچی گھاس میں چھپ کے نوا پیرا

چپ ہو جائیں

تب بھی گونج کے آنگن میں

رم جھم برسے جانا جاری

ہار سنگھار کی کلیوں کا

پنکھ ہما کے کھلتے رہے اور جڑتے رہے

افشاں کے بکھراؤ میں دھیرے دھیرے اجاگر ہوتے ہوئے

سیمابی کرے

پنپ سکے تو پنپے انساں

نر ناری میں وا ماندہ وہ نشوونما

سورج مکھی کشیدہ قامت

رعنائی در رعنائی کھلتا ہوا امکاں

جتنا پینے اتنا اور پنپنے کا ارمان کرے

اپنی ہی بینائی کی توسیع سی

پل پل تازہ نمود فضاؤں میں

پینے ورنہ

پھر کیا ہے نغمے کی اساس

ورنہ تند تکرار بھی

چوب بھی تار بھی

راکھ ستاروں کی

جھڑتی ہوئی پیہم سرد انفاس