raja gidh

giddhoñ ke harkāre ne

raaja ko batāyā

ki duur kī ek bastī

jald hī un kī

ḳhurāk banñe vaalī hai

ye sun kar raaja aur us ke sāthiyoñ ne

apne mahfūz Thikāne chhoḌe

aur us bastī kī jānib ravāna hue

bastī ke chaukīdār ne

raaja aur us ke sāthī giddhoñ ko

is shart par bastī meñ utarne kī ijāzat dī

ki vo chaukīdār ko nuqsān nahīñ pahuñchā.eñge

raaja gidh ne ye shart manzūr kar lī

aur saath hī giddhoñ ko hukm diyā

ki is se pahle

ki vo nīm-jān bastī hosh meñ aane lage

sab apnā apnā peT bhar leñ

aur mahfūz Thikānoñ kī taraf lauT jaa.eñ

lekin is martaba

raaja gidh aur us ke sāthiyoñ ne

ajiib manzar dekhā

zamīn ke kiiḌe makoḌe

giddhoñ ke aane kā shor sun kar

vāpas apne biloñ meñ nahīñ ga.e

balki unhoñ ne

ek hisār banā liyā

aur giddhoñ kī chīḳh-o-pukār ke bāvajūd

vahāñ se bhāgne kī bajā.e

un ke panjoñ se lipaT lipaT kar

un ke muñh meñ aane lage

raaja gidh aur us ke sāthiyoñ ke liye

ye ek bilkul nayā tajraba thā

gidh jaise hī

zamīn kī taraf aane kī koshish karte

bahut se kiiḌe makoḌe uḌ kar

un kī āñkhoñ meñ ghus jaate

aur unheñ andhā kar dete

gidh apnā tavāzun barqarār na rakh paate

aur zamīn par aa girte

jaise hī gidh zamīn par girte

bahut se kiiḌe makoḌe un par savār ho kar

un ke paroñ ko nākāra banā dete

yuuñ zamīn par giddhoñ ke Dher lag ga.e

ye haal dekh kar

raaja ne apne sāthiyoñ ko hukm diyā

ki jaise-taise jaan bachā kar bastī se nikal jaa.eñ

aur ḳhud sab se pahle bhaag khaḌā huā

ye dekh kar ek kiiḌe ne sar uThā kar pūchhā

ab kyā hogā

baḌī bī ne varaq-gardānī karte hue kahā

ye to sirf gidh haiñ

tum agar apne baap kī baat maan lo

to hāthī ko zamīn par girā sakte ho

giddhon ke harkare ne

raja ko bataya

ki dur ki ek basti

jald hi un ki

KHurak banne wali hai

ye sun kar raja aur us ke sathiyon ne

apne mahfuz Thikane chhoDe

aur us basti ki jaanib rawana hue

basti ke chaukidar ne

raja aur us ke sathi giddhon ko

is shart par basti mein utarne ki ijazat di

ki wo chaukidar ko nuqsan nahin pahunchaenge

raja gidh ne ye shart manzur kar li

aur sath hi giddhon ko hukm diya

ki is se pahle

ki wo nim-jaan basti hosh mein aane lage

sab apna apna peT bhar len

aur mahfuz Thikanon ki taraf lauT jaen

lekin is martaba

raja gidh aur us ke sathiyon ne

ajib manzar dekha

zamin ke kiDe makoDe

giddhon ke aane ka shor sun kar

wapas apne bilon mein nahin gae

balki unhon ne

ek hisar bana liya

aur giddhon ki chiKH-o-pukar ke bawajud

wahan se bhagne ki bajae

un ke panjon se lipaT lipaT kar

un ke munh mein aane lage

raja gidh aur us ke sathiyon ke liye

ye ek bilkul naya tajraba tha

gidh jaise hi

zamin ki taraf aane ki koshish karte

bahut se kiDe makoDe uD kar

un ki aankhon mein ghus jate

aur unhen andha kar dete

gidh apna tawazun barqarar na rakh pate

aur zamin par aa girte

jaise hi gidh zamin par girte

bahut se kiDe makoDe un par sawar ho kar

un ke paron ko nakara bana dete

yun zamin par giddhon ke Dher lag gae

ye haal dekh kar

raja ne apne sathiyon ko hukm diya

ki jaise-taise jaan bacha kar basti se nikal jaen

aur KHud sab se pahle bhag khaDa hua

ye dekh kar ek kiDe ne sar uTha kar puchha

ab kya hoga

baDi bi ne waraq-gardani karte hue kaha

ye to sirf gidh hain

tum agar apne bap ki baat man lo

to hathi ko zamin par gira sakte ho