ردیف اور قافیے

ہنسی کل سے مجھے اس بات پر ہے آ رہی خالو

کہ خالہ کہہ رہی تھیں آپ کا ہے قافیہ آلو

اسی دن سے بہت ڈرنے لگا ہوں آپ سے خالہ

جب امی نے بتایا آپ کا ہے قافیہ بھالا

اگر پوچھے کوئی کیا قافیہ ہے آپ کا پھپی

تو فوراً سامنے رکھ دوں گا لا کر تیل کی کپی

اگر شاعر کہیں بے قافیہ ہے لفظ بہنوئی

مرے بہنوئی سر پر شاعروں کے مارنا ڈوئی

اگر پوچھے کوئی کیا قافیہ ہے آپ کا دادی

تو ململ پھینک دینا اوڑھ لینا سر پہ تم کھادی

بہت ہے گھومنے کا شوق تم کو اے بڑے بھیا

نہ مارو تو بتا دوں ہے تمہارا قافیہ پہیا

تم اپنا قافیہ خود بن گئی ہو اے میری آپا

نظر لگ جائے گی تم سر پہ رکھ کر ہو ہو ٹایا

تمہارا قافیہ کوئی نہیں ہے اے نحیف امی

یہی اچھا ہے تم چپکے سے بن جاؤ ردیف امی