raftagan ka pata

vo saare rishte

jinheñ tumhāre qarīb aa kar bhulā diyā thā

vo sab marāsim ki jin ko maiñ ne

tumhārī qurbat meñ toḌ Daalā

tumhārī zulfoñ kā saaya pā kar ke

jin daraḳhtoñ kī ThanDī chhāñv se uTh gayā thā

vo saarī āñkheñ

jo rāh-e-ulfat pe merī aamad kī muntazir thiiñ

vo saare paañv jo saath chalne kī ḳhvāhishoñ meñ khaḌe hue the

magar palaT kar na dekhā maiñ ne

par ab jo mausam badal gayā hai

tum ab nahīñ ho

to saare rishte sabhī marāsim ghane daraḳhtoñ kī ThanDī chhāñv

kisī kī āñkheñ kisī ke paañv

ye pūchhte haiñ

udaas āñkhoñ meñ ujḌe ḳhvāboñ kī laash le kar

jahān-e-fānī meñ phir rahe ho

sañbhal ke chalne kī bejā koshish meñ gir rahe ho

vo shaḳhs jis kī vaj.h se tum ne hameñ nākāra

vo ab kahāñ hai

vo jis kī bāteñ sunā sunā kar jalāte rahte the

kyā huā vo

kahāñ gayā vo

unheñ batātā huuñ sard mausam meñ dhuup thī so

be-ruḳhī kī ridā ko oḌhe kisī do-pahrī meñ so ga.e ho

tum ik parā.e ke ho ga.e ho

kisī se kahtā huuñ achchhe logoñ kī sohbatoñ meñ sañvar ga.e ho

kisī se kahtā huuñ mar ga.e ho

wo sare rishte

jinhen tumhaare qarib aa kar bhula diya tha

wo sab marasim ki jin ko main ne

tumhaari qurbat mein toD Dala

tumhaari zulfon ka saya pa kar ke

jin daraKHton ki ThanDi chhanw se uTh gaya tha

wo sari aankhen

jo rah-e-ulfat pe meri aamad ki muntazir thin

wo sare panw jo sath chalne ki KHwahishon mein khaDe hue the

magar palaT kar na dekha main ne

par ab jo mausam badal gaya hai

tum ab nahin ho

to sare rishte sabhi marasim ghane daraKHton ki ThanDi chhanw

kisi ki aankhen kisi ke panw

ye puchhte hain

udas aankhon mein ujDe KHwabon ki lash le kar

jahan-e-fani mein phir rahe ho

sanbhal ke chalne ki beja koshish mein gir rahe ho

wo shaKHs jis ki wajh se tum ne hamein nakara

wo ab kahan hai

wo jis ki baaten suna suna kar jalate rahte the

kya hua wo

kahan gaya wo

unhen batata hun sard mausam mein dhup thi so

be-ruKHi ki rida ko oDhe kisi do-pahri mein so gae ho

tum ek parae ke ho gae ho

kisi se kahta hun achchhe logon ki sohbaton mein sanwar gae ho

kisi se kahta hun mar gae ho