rangin titliyan

allah jamīl hai aur titlī jamāl us kā

titlī ko husn baḳhshā ye hai kamāl us kā

koh-qāf kī parī hai is ḳhushnumā chaman meñ

yā koī huur aa.ī phūloñ kī anjuman meñ

rangīn titliyoñ kā phūloñ ke paas aanā

dil jhūmne lagā hai manzar hai ye suhānā

merī nazar ga.ī jab rangīn titliyoñ par

samjhā ki aa ga.ī hai qaus-e-quzah zamīñ par

titlī ke ḳhushnumā rang āñkhoñ ko bhā rahe haiñ

is ke hasīn buuTe dil meñ samā rahe haiñ

allāh ne 'atā kī titlī ko ḳhush-numā.ī

us kī razā se aa.ī titlī meñ dilrubā.ī

de kar paroñ ko harkat chakkar lagā rahī hai

phūloñ ko gudgudā kar hañsnā sikhā rahī hai

kyā āsmāñ se utrī bārāt titliyoñ kī

gulshan meñ aa ke dekho ifrāt titliyoñ kī

ye ġhol titliyoñ kā gulshan kī Tahniyoñ par

ḳhushiyāñ luTā rahā hai ye dil-fareb manzar

ruḳhsat huī udāsī aa.ī hai shādmānī

insān ke liye hai qudrat kī mehrbānī

ai shāndār titlī tū hai chaman kī raanī

phūloñ bharī ye kyārī hai terī rājdhānī

haiñ mor aur titlī donoñ hī ḳhūb-sūrat

insān ko pasand hai in ke paroñ kī zīnat

duniyā ko mil ga.ī hai duniyā meñ shān-o-shaukat

titlī meñ hai nazākat aur mor meñ sabāhat

titlī hai ḳhūbiyoñ kā anmol sā ḳhazāna

bachche jhapaT rahe haiñ titlī pe vālihāna

hotī nahīñ kisī ko titlī se kuchh shikāyat

dil meñ hai har bashar ke titlī se pyār-o-ulfat

ye titliyoñ ke jalve phūloñ kā muskurānā

samjhūñ ise haqīqat yā ḳhvāb hai suhānā

tā'rīf hai ḳhudā kī jis ne banā.ī titlī

naqsh-o-nigār de kar us ne sajā.ī titlī

allah jamil hai aur titli jamal us ka

titli ko husn baKHsha ye hai kamal us ka

koh-qaf ki pari hai is KHushnuma chaman mein

ya koi hur aai phulon ki anjuman mein

rangin titliyon ka phulon ke pas aana

dil jhumne laga hai manzar hai ye suhana

meri nazar gai jab rangin titliyon par

samjha ki aa gai hai qaus-e-quzah zamin par

titli ke KHushnuma rang aankhon ko bha rahe hain

is ke hasin buTe dil mein sama rahe hain

allah ne 'ata ki titli ko KHush-numai

us ki raza se aai titli mein dilrubai

de kar paron ko harkat chakkar laga rahi hai

phulon ko gudguda kar hansna sikha rahi hai

kya aasman se utri baraat titliyon ki

gulshan mein aa ke dekho ifraat titliyon ki

ye ghol titliyon ka gulshan ki Tahniyon par

KHushiyan luTa raha hai ye dil-fareb manzar

ruKHsat hui udasi aai hai shadmani

insan ke liye hai qudrat ki mehrbani

ai shandar titli tu hai chaman ki rani

phulon bhari ye kyari hai teri rajdhani

hain mor aur titli donon hi KHub-surat

insan ko pasand hai in ke paron ki zinat

duniya ko mil gai hai duniya mein shan-o-shaukat

titli mein hai nazakat aur mor mein sabahat

titli hai KHubiyon ka anmol sa KHazana

bachche jhapaT rahe hain titli pe walihana

hoti nahin kisi ko titli se kuchh shikayat

dil mein hai har bashar ke titli se pyar-o-ulfat

ye titliyon ke jalwe phulon ka muskurana

samjhun ise haqiqat ya KHwab hai suhana

ta'rif hai KHuda ki jis ne banai titli

naqsh-o-nigar de kar us ne sajai titli