raqs-e-musalsal

chalī jo chhūT ke zindān-e-vaqt se āvāz

'ubūr kar ga.ī maazī ke be-karāñ lamhe

pahuñch ke azmina-e-qabl-e-dāstāñ ke pare

rukī to naqsh-gar-e-zīst se sar-e-āġhāz

achānak us kī jhalak dekh kar ye farmāyā

abhī hai zarra-e-ḳhākī meñ jur.at-e-parvāz

kahā adab se ki ai kārsāz kyā hai ye raaz

ki jis maqām pe pahuñchā yahī maqām aayā

khule the hoñT ki āvāz phir se Duub ga.ī

buland hone lage sho'la-hā-e-gūnā-gūñ

har ek samt se uTThī sadā-e-kun-faya-kūn

ubhar rahī thī ba-har-lamha kā.enāt na.ī

hanūz dahr meñ guuñj us sadā kī hai baaqī

abhī hai raqs-e-musalsal meñ rūh-e-āfāqī

chali jo chhuT ke zindan-e-waqt se aawaz

'ubur kar gai mazi ke be-karan lamhe

pahunch ke azmina-e-qabl-e-dastan ke pare

ruki to naqsh-gar-e-zist se sar-e-aghaz

achanak us ki jhalak dekh kar ye farmaya

abhi hai zarra-e-KHaki mein jurat-e-parwaz

kaha adab se ki ai karsaz kya hai ye raaz

ki jis maqam pe pahuncha yahi maqam aaya

khule the honT ki aawaz phir se Dub gai

buland hone lage sho'la-ha-e-guna-gun

har ek samt se uTThi sada-e-kun-faya-kun

ubhar rahi thi ba-har-lamha kaenat nai

hanuz dahr mein gunj us sada ki hai baqi

abhi hai raqs-e-musalsal mein ruh-e-afaqi