rat-jaga

vo merī zindagī kā sab se pahlā ratjagā thā

jab qadam rakkhā thā maiñ ne zindagī kī sātvīñ shab meñ

december kī ikattīs aur ‘urūj-e-māh kī vo āḳhir shab thī

kahā jaatā hai

us shab sātveñ ākāsh par taqdīr ke sachche farishte ne

tirā bandhan hamesha ke liye yuuñ mujh se bāñdhā thā

mire māthe pe kuchh apne qalam se harf likkhe the

mirī maañ ne usī shab

āyatoñ ke saa.e meñ

tāroñ kī chhāoñ meñ

akelā chāñd dekhā thā

charāġhāñ hī charāġhāñ thā

mire purkhoñ ke hāthoñ meñ

qalam thā ek chāñdī kā

zabāñ par āyateñ thiiñ aur hathelī par

purānā nuqra.ī pyāla

mire māthe pe chāñdī ke qalam se un buzurgoñ ne

sunahrī harf likkhā thā

charāġhāñ hī charāġhāñ thā

december kī ikattīs aur ‘urūj-e-māh kī phir āḳhirī shab hai

magar imshab

farishte so chuke

vo bhī jinhoñ ne āsmāñ par terā bandhan mujh se bāñdhā thā

mire purkhoñ ko bhī niiñd aa ga.ī kab kī

koī pūchhe

unhoñ ne mere māthe par jo ujle harf likkhe the

vo saare rang kachche the

vo saare harf jhūTe the

maiñ jab se aaj tak ik ratjage kī kaifiyat meñ huuñ

akelā chāñd hañstā hai

farishtoñ kā likhā ik harf āñkhoñ meñ chamaktā hai

charāġhāñ hī charāġhāñ hai

wo meri zindagi ka sab se pahla ratjaga tha

jab qadam rakkha tha main ne zindagi ki satwin shab mein

december ki ikattis aur ‘uruj-e-mah ki wo aaKHir shab thi

kaha jata hai

us shab satwen aakash par taqdir ke sachche farishte ne

tera bandhan hamesha ke liye yun mujh se bandha tha

mere mathe pe kuchh apne qalam se harf likkhe the

meri man ne usi shab

aayaton ke sae mein

taron ki chhaon mein

akela chand dekha tha

charaghan hi charaghan tha

mere purkhon ke hathon mein

qalam tha ek chandi ka

zaban par aayaten thin aur hatheli par

purana nuqrai pyala

mere mathe pe chandi ke qalam se un buzurgon ne

sunahri harf likkha tha

charaghan hi charaghan tha

december ki ikattis aur ‘uruj-e-mah ki phir aaKHiri shab hai

magar imshab

farishte so chuke

wo bhi jinhon ne aasman par tera bandhan mujh se bandha tha

mere purkhon ko bhi nind aa gai kab ki

koi puchhe

unhon ne mere mathe par jo ujle harf likkhe the

wo sare rang kachche the

wo sare harf jhuTe the

main jab se aaj tak ek ratjage ki kaifiyat mein hun

akela chand hansta hai

farishton ka likha ek harf aankhon mein chamakta hai

charaghan hi charaghan hai