rauzan-e-hijr

aaj phir dasht-e-vafā meñ

tirī yādoñ ke sarāb

mujh ko bhaTkā.e chale jaate haiñ

aur is dasht meñ

maiñ yūñhī akelā chup-chāp

ret par DhūñDhtā rahtā huuñ

na-jāne kyā kyā

terī ḳhushbū tire ḳhad

tere qadam terā ḳhayāl

jaane kyā DhūñDhtā rahtā huuñ

musalsal mirī jaañ

dā.era-vār bagūle se mirī āñkhoñ meñ

aise phirte haiñ ki

har samt tirī yaad kī ḳhaak

chār-sū phail ke har shai ko chhupā letī hai

terī ḳhushbū tire ḳhad

tere qadam terā ḳhayāl

ḳhaak har shai ko chhupā letī hai

mauja-e-dīd ko nādīda banā detī hai

vaqt-e-maujūd ko mahdūd sā kar detī hai

lekin aise meñ mirī jaan

tire hijr kā lams

mujh ko an-dekhī mohabbat kā yaqīñ detā hai

paañv meñ chubhte hue ret ke zarre us dam

dūr-uftāda manāzil kā pata dete haiñ

phir jhulastā huā sūraj bhī sukūñ detā hai

kū-ba-kū phailtā jaatā hai hisār-e-man-o-tū

rauzan-e-hijr se manzil kā pata miltā hai

aaj phir dasht-e-wafa mein

teri yaadon ke sarab

mujh ko bhaTkae chale jate hain

aur is dasht mein

main yunhi akela chup-chap

ret par DhunDhta rahta hun

na-jaane kya kya

teri KHushbu tere KHad

tere qadam tera KHayal

jaane kya DhunDhta rahta hun

musalsal meri jaan

daera-war bagule se meri aankhon mein

aise phirte hain ki

har samt teri yaad ki KHak

chaar-su phail ke har shai ko chhupa leti hai

teri KHushbu tere KHad

tere qadam tera KHayal

KHak har shai ko chhupa leti hai

mauja-e-did ko nadida bana deti hai

waqt-e-maujud ko mahdud sa kar deti hai

lekin aise mein meri jaan

tere hijr ka lams

mujh ko an-dekhi mohabbat ka yaqin deta hai

panw mein chubhte hue ret ke zarre us dam

dur-uftada manazil ka pata dete hain

phir jhulasta hua suraj bhi sukun deta hai

ku-ba-ku phailta jata hai hisar-e-man-o-tu

rauzan-e-hijr se manzil ka pata milta hai