ruh-e-taghazzul

maiñ apne qalb meñ jab nūr-e-irfāñ dekh letā huuñ

to har zarra meñ ik ḳhurshīd-e-tābāñ dekh letā huuñ

miTā kar apnī hastī rāh-e-haq meñ khul ga.iiñ āñkheñ

ki mar kar zindagī kā rāz-e-pinhāñ dekh letā huuñ

haqīqī ishq kā jazba hai dil meñ jis kī barakat se

hayāt aur maut ke asrār-e-uryāñ dekh letā huuñ

kiye haiñ ishq aur ulfat ke saare marhale jab tai

to duniyā bhar kī har mushkil ko āsāñ dekh letā huuñ

chhupā saktā nahīñ tū ḳhud ko mujh se laakh pardoñ meñ

tirī sūrat har ik shai meñ numāyāñ dekh letā huuñ

kahānī kyā sunā.ūñ dil-jaloñ kī ġham ke māroñ kī

ki uThtā chār-sū ik ġham kā tūfāñ dekh letā huuñ

taḌap hai dard hai rañj-o-alam hai be-qarārī hai

ye mulk aur qaum kā hāl-e-pareshāñ dekh letā huuñ

isī pyāre vatan hindostāñ kī ġhair hālat hai

ki jis par ġhair ko bhī aaj nāzāñ dekh letā huuñ

nikaltī hai agar ik aah bhī mazlūm ke dil se

zamīñ se arsh tak har shai ko larzāñ dekh letā huuñ

ghaTā.eñ ġham kī sar par chhā ga.iiñ jo hind vāloñ ke

dar-o-dīvār ko bhārat ke giryāñ dekh letā huuñ

abhī hindostāñ ke din bhale aa.e nahīñ shāyad

ki maiñ laḌte hue hindū musalmāñ dekh letā huuñ

na kyuuñ ai 'āftāb' aa.e nazar ummīd kī sūrat

ki jab taklīf meñ rāhat ke sāmāñ dekh letā huuñ

main apne qalb mein jab nur-e-irfan dekh leta hun

to har zarra mein ek KHurshid-e-taban dekh leta hun

miTa kar apni hasti rah-e-haq mein khul gain aankhen

ki mar kar zindagi ka raaz-e-pinhan dekh leta hun

haqiqi ishq ka jazba hai dil mein jis ki barakat se

hayat aur maut ke asrar-e-uryan dekh leta hun

kiye hain ishq aur ulfat ke sare marhale jab tai

to duniya bhar ki har mushkil ko aasan dekh leta hun

chhupa sakta nahin tu KHud ko mujh se lakh pardon mein

teri surat har ek shai mein numayan dekh leta hun

kahani kya sunaun dil-jalon ki gham ke maron ki

ki uThta chaar-su ek gham ka tufan dekh leta hun

taDap hai dard hai ranj-o-alam hai be-qarari hai

ye mulk aur qaum ka haal-e-pareshan dekh leta hun

isi pyare watan hindostan ki ghair haalat hai

ki jis par ghair ko bhi aaj nazan dekh leta hun

nikalti hai agar ek aah bhi mazlum ke dil se

zamin se arsh tak har shai ko larzan dekh leta hun

ghaTaen gham ki sar par chha gain jo hind walon ke

dar-o-diwar ko bhaarat ke giryan dekh leta hun

abhi hindostan ke din bhale aae nahin shayad

ki main laDte hue hindu musalman dekh leta hun

na kyun ai 'aftab' aae nazar ummid ki surat

ki jab taklif mein rahat ke saman dekh leta hun