sal-e-nau

guzishta saal to jo thā so thā ye sāl-e-nau

ḳhudā kare ki na.e mausamoñ ke saath aa.e

miTā hī de jo jahāñ se vujūd nafrat kā

mohabbatoñ ke hasīñ silsiloñ ke saath aa.e

ye sang-e-mīl ho ikkīsvīñ sadī ke liye

na.ī umang na.e hausloñ ke saath aa.e

jo dost likkheñ na.ī raushnī kā afsāna

ye saal aise na.e dostoñ ke saath aa.e

ki maañd paḌne lage jin se qumqumoñ kī chamak

añdherī raat meñ un jugnūoñ ke saath aa.e

guzishta daur to guzrā hai karbnākī meñ

nayā zamāna hasīñ manzaroñ ke saath aa.e

ye saal vo ho jise 'ishq kī sadī kahiye

vajūd-e-zāt kī sab dhaḌkanoñ ke saath aa.e

purāne dil meñ na.ī dhaḌkanoñ kī aahaT ho

ruḳh-o-nigāh safed ā.inoñ ke saath aa.e

hoñ zillatoñ ke purāne vo daaġh māthe par

na vahm kī na.ī rusvā.iyoñ ke saath aa.e

'avām ke liye ye saal ho baġhāvat kā

na qā.idoñ kī hī gumrāhiyoñ ke saath aa.e

ho nasl-e-nau kī kashākash kā koī is meñ vujūd

na guzre sāloñ kī un ranjishoñ ke saath aa.e

qalam kī duniyā meñ tanqīd kī numā.ish ho

na tīkhe lahje kaḌe tevaroñ ke saath aa.e

mile rihā.ī sitāroñ kī bālā-dastī se

kuchh aisī raushnī tīra-shaboñ ke saath aa.e

mire kalām meñ talḳhī-o-tīrgī hai bahut

ye saal sho’la-rū shīrīñ-laboñ ke saath aa.e

jagā de ḳhvāb meñ mad.hosh naujavānoñ ko

ye saal itnī baḌī āñdhiy.oñ ke saath aa.e

chakhā de jo na.ī maujoñ kī saḳhtiyoñ kā maza

na kashtiyoñ ke na hī sāhiloñ ke saath aa.e

zamāne bhar ko ka.ī tīrgī kā shikva hai

ye saal kyoñ na ka.ī sūrajoñ ke saath aa.e

zamīñ kī chhātī meñ ik aag sī sulagtī hai

so āsmān kaḌī bārishoñ ke saath aa.e

guzishta sal to jo tha so tha ye sal-e-nau

KHuda kare ki nae mausamon ke sath aae

miTa hi de jo jahan se wujud nafrat ka

mohabbaton ke hasin silsilon ke sath aae

ye sang-e-mil ho ikkiswin sadi ke liye

nai umang nae hauslon ke sath aae

jo dost likkhen nai raushni ka afsana

ye sal aise nae doston ke sath aae

ki mand paDne lage jin se qumqumon ki chamak

andheri raat mein un jugnuon ke sath aae

guzishta daur to guzra hai karbnaki mein

naya zamana hasin manzaron ke sath aae

ye sal wo ho jise 'ishq ki sadi kahiye

wajud-e-zat ki sab dhaDkanon ke sath aae

purane dil mein nai dhaDkanon ki aahaT ho

ruKH-o-nigah safed aainon ke sath aae

hon zillaton ke purane wo dagh mathe par

na wahm ki nai ruswaiyon ke sath aae

'awam ke liye ye sal ho baghawat ka

na qaidon ki hi gumrahiyon ke sath aae

ho nasl-e-nau ki kashakash ka koi is mein wujud

na guzre salon ki un ranjishon ke sath aae

qalam ki duniya mein tanqid ki numaish ho

na tikhe lahje kaDe tewaron ke sath aae

mile rihai sitaron ki baala-dasti se

kuchh aisi raushni tira-shabon ke sath aae

mere kalam mein talKHi-o-tirgi hai bahut

ye sal sho’la-ru shirin-labon ke sath aae

jaga de KHwab mein madhosh naujawanon ko

ye sal itni baDi aandhiyon ke sath aae

chakha de jo nai maujon ki saKHtiyon ka maza

na kashtiyon ke na hi sahilon ke sath aae

zamane bhar ko kai tirgi ka shikwa hai

ye sal kyon na kai surajon ke sath aae

zamin ki chhati mein ek aag si sulagti hai

so aasman kaDi barishon ke sath aae