sathi

maiñ us ko paanā bhī chāhūñ

to ye mere liye nā-mumkin hai

vo aage aage tez-ḳhirām

maiñ us ke pīchhe pīchhe

uftāñ ḳhezāñ

āvāzeñ detā

shor machātā

kab se ravāñ huuñ

barg-e-ḳhizāñ huuñ

jab maiñ uktā kar ruk jā.ūñgā

vo bhī pal bhar ko Thahar kar

mujh se āñkheñ chaar karegā

phir apnī chāhat kā iqrār karegā

phir maiñ

muñh toḌ ke

tezī se ghar kī jānib lauTūñgā

apne naqsh-e-qadam rouñdūñgā

ab vo dil thaam ke

mere pīchhe lapaktā aa.egā

naddī naale

patthar parbat phāñd aa jā.egā

maiñ aage aage

vo pīchhe pīchhe

donoñ kī raftār hai ik jaisī

phir ye kaise ho saktā hai

vo mujh ko yā maiñ us ko pā luuñ

main us ko pana bhi chahun

to ye mere liye na-mumkin hai

wo aage aage tez-KHiram

main us ke pichhe pichhe

uftan KHezan

aawazen deta

shor machata

kab se rawan hun

barg-e-KHizan hun

jab main ukta kar ruk jaunga

wo bhi pal bhar ko Thahar kar

mujh se aankhen chaar karega

phir apni chahat ka iqrar karega

phir main

munh toD ke

tezi se ghar ki jaanib lauTunga

apne naqsh-e-qadam roundunga

ab wo dil tham ke

mere pichhe lapakta aaega

naddi nale

patthar parbat phand aa jaega

main aage aage

wo pichhe pichhe

donon ki raftar hai ek jaisi

phir ye kaise ho sakta hai

wo mujh ko ya main us ko pa lun