sajda

phir usī shoḳh kā ḳhayāl aayā

phir nazar meñ vo ḳhush-jamāl aayā

phir taḌapne lagā dil-e-muztar

phir barasne lagā hai dīda-e-tar

yaad aa.iiñ vo chāñdnī rāteñ

vo hañsī khel dil-lagī bāteñ

shab-e-tārīk hai ḳhamoshī hai

kal jahāñ mahv-e-aish-koshī hai

lutf sajdoñ meñ aa rahā hai mujhe

chhup ke koī bulā rahā hai mujhe

chūḌiyāñ baj rahī haiñ hāthoñ kī

aa.ī āvāz us kī bātoñ kī

uḌ rahā hai ġhubār-e-nūr-e-badan

phailtī jā rahī hai bū-e-dahan

mauj-e-tasnīm o kaif-e-ḳhuld-e-barīñ

jagmagātā badan chamaktī jabīñ

apne āñchal meñ muñh chhupā.e hue

aa rahā hai qadam baḌhā.e hue

naġhme pāzeb ke sunāte hue

baḳht-e-ḳhufta mire jagāte hue

ishva-o-nāz kā fusūñ le kar

saath ik lashkar-e-junūñ le kar

duur se muskurātā aatā hai

bijliyāñ sī girātā aatā hai

vo ki rañgīñ kiran tabassum kī

ik musalsal laḌī tarannum kī

parda-e-tan meñ raag poshīda

raag vo jis meñ aag poshīda

bāñsurī sī bajā.e jaatā hai

aag tan meñ lagā.e jaatā hai

ek duniyā-e-rañg-o-bū ban kar

ḳhūñ-shuda dil kī aarzū ban kar

na.ī dulhan kī thartharī ban kar

us ke hoñToñ kī kapkapī ban kar

mere dil meñ samā gayā koī

merī hastī pe chhā gayā koī

phir usi shoKH ka KHayal aaya

phir nazar mein wo KHush-jamal aaya

phir taDapne laga dil-e-muztar

phir barasne laga hai dida-e-tar

yaad aain wo chandni raaten

wo hansi khel dil-lagi baaten

shab-e-tarik hai KHamoshi hai

kal jahan mahw-e-aish-koshi hai

lutf sajdon mein aa raha hai mujhe

chhup ke koi bula raha hai mujhe

chuDiyan baj rahi hain hathon ki

aai aawaz us ki baaton ki

uD raha hai ghubar-e-nur-e-badan

phailti ja rahi hai bu-e-dahan

mauj-e-tasnim o kaif-e-KHuld-e-barin

jagmagata badan chamakti jabin

apne aanchal mein munh chhupae hue

aa raha hai qadam baDhae hue

naghme pazeb ke sunate hue

baKHt-e-KHufta mere jagate hue

ishwa-o-naz ka fusun le kar

sath ek lashkar-e-junun le kar

dur se muskuraata aata hai

bijliyan si giraata aata hai

wo ki rangin kiran tabassum ki

ek musalsal laDi tarannum ki

parda-e-tan mein rag poshida

rag wo jis mein aag poshida

bansuri si bajae jata hai

aag tan mein lagae jata hai

ek duniya-e-rang-o-bu ban kar

KHun-shuda dil ki aarzu ban kar

nai dulhan ki tharthari ban kar

us ke honTon ki kapkapi ban kar

mere dil mein sama gaya koi

meri hasti pe chha gaya koi