سر رہگزر

اک موہوم سا کاشانہ نظر آتا ہے

ایک مغموم سا غم خانہ نظر آتا ہے

اپنی منزل ہی مجھے کھینچ رہی ہے شاید

ہم سفر پر مجھے بیگانہ نظر آتا ہے

دیکھ اے جوش جنوں بادیہ پیمائی کو

نقش پا بھی مجھے دیوانہ نظر آتا ہے

داستاں پھیلی ہوئی ہے مری صحراؤں میں

ہم زبان آج یہ ویرانہ نظر آتا ہے

خاک اڑاتی ہوئی پھرتی ہے ہوائے سرسر

منتشر میرا ہی افسانہ نظر آتا ہے

اپنی محرومیٔ قسمت کا گلہ ہے ورنہ

شمع کے گرد بھی پروانہ نظر آتا ہے