sarab

vaqt ke is sahrā meñ kab se

karb-zada lamhoñ kā bhārī bojh uThā.e

rasta rasta bhaTak rahā huuñ

sahrā sahrā reg-e-ravāñ ke sūkhe dariyā

aur maiñ pyāsā

por por se chaTaḳh rahā huuñ

lekin phir bhī tez-qadam huuñ

shāyad dariyā mil jā.egā

shāyad ruuh kī pyaas bujhegī

sahrā meñ to qadam qadam par

bahte dariyāoñ ke dhoke

chāroñ samt nazar aate haiñ

lahrāte haiñ

paas pahuñch kar kho jaate haiñ

ret ke saare dariyā mujh meñ

andar andar sūkhe aañsū ho jaate haiñ

pyaas baḌhātī paas bulātī ret kī lahreñ

phir se nazar meñ aa jaatī haiñ

phir se is sahrā ke safar meñ

ummīdeñ sī bañdh jaatī haiñ

kisī sarāb ko jaan ke dariyā

tez-qadam phir ho jaatā huuñ

waqt ke is sahra mein kab se

karb-zada lamhon ka bhaari bojh uThae

rasta rasta bhaTak raha hun

sahra sahra reg-e-rawan ke sukhe dariya

aur main pyasa

por por se chaTaKH raha hun

lekin phir bhi tez-qadam hun

shayad dariya mil jaega

shayad ruh ki pyas bujhegi

sahra mein to qadam qadam par

bahte dariyaon ke dhoke

chaaron samt nazar aate hain

lahraate hain

pas pahunch kar kho jate hain

ret ke sare dariya mujh mein

andar andar sukhe aansu ho jate hain

pyas baDhati pas bulati ret ki lahren

phir se nazar mein aa jati hain

phir se is sahra ke safar mein

ummiden si bandh jati hain

kisi sarab ko jaan ke dariya

tez-qadam phir ho jata hun