sarw-e-arzu

nazar-nazar pilā.egā

nafas-nafas samā.egā

vo jumbishoñ kī shā'irī

adā adā sunā.egā

vo bā-kamāl husn-e-zan

kamāl āzmā.egā

rumūz-e-'ishq-āshnā

junūñ-asar banā.egā

bahār-e-mast-gām ko

vo aa.ina dikhā.egā

sabā-e-ḳhush-ḳhirām ko

nayā chalan sikhā.egā

vo ḳhush-gulū vo kam-suḳhan

kabhī jo gungunā.egā

ġhazal mirī sunā.egā

vo giit mere gā.egā

vo shauq-e-kam-libās pe

na.ī qabā sajā.egā

fasīl-e-vahshat-e-sukūt

āhaToñ se Dhā.egā

vo rashk-e-gul qatār-e-gul

qadam qadam khilā.egā

vo apnī saarī nik.hateñ

mirī nazar meñ lā.egā

vo ranjishoñ ke daur meñ

rifāqateñ baḌhā.egā

jhukā jhukā ke chashm-e-nam

qayāmateñ uThā.egā

sharīk-e-dard us kā maiñ

vo mere dukh baTā.egā

haiñ jān-o-rūh muntazir

ki vo kabhī to aa.egā

mirī nigāh-e-shauq vo

kahīñ girī jo pā.egā

adā-e-ḳhush-gumān se

vo chuum kar uThā.egā

vo laaj zeb-tan kiye

jo mahfiloñ meñ jā.egā

gurez ġhair se mire

qarīb aur aa.egā

vo ham-safar vo ajnabī

'azāb-e-jāñ miTā.egā

magar ai sarv-e-ārzū

vo kis jahāñ se aa.egā

nazar-nazar pilaega

nafas-nafas samaega

wo jumbishon ki sha'iri

ada ada sunaega

wo ba-kamal husn-e-zan

kamal aazmaega

rumuz-e-'ishq-ashna

junun-asar banaega

bahaar-e-mast-gam ko

wo aaina dikhaega

saba-e-KHush-KHiram ko

naya chalan sikhaega

wo KHush-gulu wo kam-suKHan

kabhi jo gungunaega

ghazal meri sunaega

wo git mere gaega

wo shauq-e-kam-libas pe

nai qaba sajaega

fasil-e-wahshat-e-sukut

aahaTon se Dhaega

wo rashk-e-gul qatar-e-gul

qadam qadam khilaega

wo apni sari nikhaten

meri nazar mein laega

wo ranjishon ke daur mein

rifaqaten baDhaega

jhuka jhuka ke chashm-e-nam

qayamaten uThaega

sharik-e-dard us ka main

wo mere dukh baTaega

hain jaan-o-ruh muntazir

ki wo kabhi to aaega

meri nigah-e-shauq wo

kahin giri jo paega

ada-e-KHush-guman se

wo chum kar uThaega

wo laj zeb-tan kiye

jo mahfilon mein jaega

gurez ghair se mere

qarib aur aaega

wo ham-safar wo ajnabi

'azab-e-jaan miTaega

magar ai sarw-e-arzu

wo kis jahan se aaega