shaer-e-darmanda

zindagī tere liye bistar-e-sanjāb-o-samūr

aur mere liye afrañg kī daryūza-garī

āfiyat-koshī-e-ābā ke tufail

maiñ huuñ darmāñda-o-be-chāra adiib

ḳhasta-e-fikr-e-ma.āsh

pāra-e-nān-javīñ ke liye mohtāj haiñ ham

maiñ mire dost mire saikaḌoñ arbāb-e-vatan

ya.anī afrañg ke gulzāroñ ke phuul

tujhe ik shā.er-e-darmāñda kī ummīd na thī

mujh se jis roz sitāra tirā vābasta huā

tū samajhtī thī ki ik roz mirā zehn-e-rasā

aur mire ilm-o-hunar

bahr o bar se tirī zīnat ke guhar lā.eñge

mere raste meñ jo haa.il hoñ mire tīra-nasīb

kyuuñ duā.eñ tarī be-kār na jaa.eñ

tere rātoñ ke sujūd aur niyāz

(us kā baa.is mirā ilhād bhī hai)

ai mirī sham-e-shabistān-e-vafā

bhuul jā mere liye

zindagī ḳhvāb kī āsūda farāmoshī hai

tujhe ma.alūm hai mashriq kā ḳhudā koī nahīñ

aur agar hai to sarā-parda-e-nisyāñ meñ hai

tū ''masarrat'' hai mirī tū mirī ''bedārī'' hai

mujhe āġhosh meñ le

do ''anā'' mil ke jahāñ-soz baneñ

aur jis ahd kī hai tujh ko duāoñ meñ talāsh

aap hī aap huvaidā ho jaa.e

zindagi tere liye bistar-e-sanjab-o-samur

aur mere liye afrang ki daryuza-gari

aafiyat-koshi-e-aba ke tufail

main hun darmanda-o-be-chaara adib

KHasta-e-fikr-e-maash

para-e-nan-jawin ke liye mohtaj hain hum

main mere dost mere saikaDon arbab-e-watan

yani afrang ke gulzaron ke phul

tujhe ek shaer-e-darmanda ki ummid na thi

mujh se jis roz sitara tera wabasta hua

tu samajhti thi ki ek roz mera zehn-e-rasa

aur mere ilm-o-hunar

bahr o bar se teri zinat ke guhar laenge

mere raste mein jo hail hon mere tira-nasib

kyun duaen tari be-kar na jaen

tere raaton ke sujud aur niyaz

(us ka bais mera ilhad bhi hai)

ai meri sham-e-shabistan-e-wafa

bhul ja mere liye

zindagi KHwab ki aasuda faramoshi hai

tujhe malum hai mashriq ka KHuda koi nahin

aur agar hai to sara-parda-e-nisyan mein hai

tu masarrat hai meri tu meri bedari hai

mujhe aaghosh mein le

do ana mil ke jahan-soz banen

aur jis ahd ki hai tujh ko duaon mein talash

aap hi aap huwaida ho jae