shah sahab and sons

shaah sāhab ḳhush-nazar the

ḳhush-adā the

aur rozī ke añdhere rāstoñ par

sabr kī TuuTī huī chappal pahan kar

ik lalak ik tantane ke saath sargarm-e-safar the

aur jiine ke maraz meñ mubtalā the

jo ġhizā.eñ dastaras meñ thiiñ

ajab be-nūr thiiñ

un meñ numū-kārī na thī

vo jo motī kī sī aab āñkhoñ meñ thī

jaatī rahī

putliyoñ meñ ḳhuun

kaa.ī kī tarah jamne lagā

rafta rafta

motiyābind un ke dīdoñ par

zamurrad kī tarah utrā

ajab pardā paḌā

saare zamāne se hijāb aane lagā

muztarib āñkhoñ ke Dhele

ḳhushk pathrā.e hue

itne be-masraf ki bas

ik sabza darvāze ke pīchhe

band siipī kī tarah se

aur añdhere ā.īna dikhlā.eñ istinjā kareñ

sirf dushman raushnī kā intizār-e-zindagānī ġhazva-e-ḳhandaq huī

is qadar dekhā ki nā-bīnā hue

aur jab ravāq nigāhoñ meñ

siyāhī kī silā.ī phir ga.ī

chhitnār āñkhoñ se

tajallī kī sunahrī patiyāñ girne lagīñ

to shaah sāhab aur be-sāya hue

un kī andhī muntaqim āñkhoñ meñ duniyā

ek qātil kī tarah se jam ga.ī

jaise marte saañp kī āñkhoñ meñ

apne ajnabī dushman kā aks

yuuñ sarāsīma hue

yuuñ zaat ke sunsān sahrāoñ meñ afsurda phire

jaise jiite jāgte logoñ ko dekhā hī na ho

jo shabīheñ dhyān meñ mahfūz thiiñ

in se rishta hī na ho

jagmagātī be-qarār āñkheñ

kisī sahme hue ghoñghe ke hāthoñ kī tarah

dekhtī thiiñ sūñghtī thiiñ lams kartī thiiñ

vahī jaatī rahīñ to zindagī se rābta jaatā rahā

hamdamī kā silsila jaatā rahā

vo jo ik gahrā ta.alluq

ik amar sambañdh sā

chāroñ-taraf bikhrī huī chīzoñ se thā

hañste hue rote hue logoñ se thā

is tarah TuuTā ki jaise sher kī ik jast se

zubair kī riiḌh kī haDDī chīḳh jaatī hai

barsoñ be-tarah be-kal rahe

ek din āñkhoñ meñ sahrā jal uThā

vo ḳhayāl aayā ki chehra jal uThā

apne beToñ ko kaleje se lagāyā

jī bharā thā abr ke mānind ro.e

rah chuke to ek mohlik ātishīñ tezāb ke

sho.ala-e-saffāk se

un kī fāqa-sanj āñkhoñ ko jalāyā

aur sajde meñ gire

jaise gahrī niiñd meñ hoñ

jaise ik sakte meñ hoñ

muddatoñ se un bayābāñ rāstoñ par

chaar andhe dostoñ kā ek koras gūñjtā hai

ai sakhī shahr-e-saḳhāvat meñ guzār auqāt kar

ai nazr vaale nazr ḳhairāt kar

shah sahab KHush-nazar the

KHush-ada the

aur rozi ke andhere raston par

sabr ki TuTi hui chappal pahan kar

ek lalak ek tantane ke sath sargarm-e-safar the

aur jine ke maraz mein mubtala the

jo ghizaen dastaras mein thin

ajab be-nur thin

un mein numu-kari na thi

wo jo moti ki si aab aankhon mein thi

jati rahi

putliyon mein KHun

kai ki tarah jamne laga

rafta rafta

motiyabind un ke didon par

zamurrad ki tarah utra

ajab parda paDa

sare zamane se hijab aane laga

muztarib aankhon ke Dhele

KHushk pathrae hue

itne be-masraf ki bas

ek sabza darwaze ke pichhe

band sipi ki tarah se

aur andhere aaina dikhlaen istinja karen

sirf dushman raushni ka intizar-e-zindagani ghazwa-e-KHandaq hui

is qadar dekha ki na-bina hue

aur jab rawaq nigahon mein

siyahi ki silai phir gai

chhitnar aankhon se

tajalli ki sunahri patiyan girne lagin

to shah sahab aur be-saya hue

un ki andhi muntaqim aankhon mein duniya

ek qatil ki tarah se jam gai

jaise marte sanp ki aankhon mein

apne ajnabi dushman ka aks

yun sarasima hue

yun zat ke sunsan sahraon mein afsurda phire

jaise jite jagte logon ko dekha hi na ho

jo shabihen dhyan mein mahfuz thin

in se rishta hi na ho

jagmagati be-qarar aankhen

kisi sahme hue ghonghe ke hathon ki tarah

dekhti thin sunghti thin lams karti thin

wahi jati rahin to zindagi se rabta jata raha

hamdami ka silsila jata raha

wo jo ek gahra talluq

ek amar sambandh sa

chaaron-taraf bikhri hui chizon se tha

hanste hue rote hue logon se tha

is tarah TuTa ki jaise sher ki ek jast se

zubair ki riDh ki haDDi chiKH jati hai

barson be-tarah be-kal rahe

ek din aankhon mein sahra jal uTha

wo KHayal aaya ki chehra jal uTha

apne beTon ko kaleje se lagaya

ji bhara tha abr ke manind roe

rah chuke to ek mohlik aatishin tezab ke

shoala-e-saffak se

un ki faqa-sanj aankhon ko jalaya

aur sajde mein gire

jaise gahri nind mein hon

jaise ek sakte mein hon

muddaton se un bayaban raston par

chaar andhe doston ka ek koras gunjta hai

ai sakhi shahr-e-saKHawat mein guzar auqat kar

ai nazr wale nazr KHairaat kar