shair ke dil ki tamanna

miT jaa.eñ mulk se buġhz-o-hasad aur dil meñ vatan kī izzat ho

dāman meñ fazāoñ ke har jā ik amn-o-sukūñ kī sarvat ho

siine hoñ paak kudūrat se har lab par naġhma-e-ulfat ho

firdaus-e-barīñ kā namūna phir duniyā meñ pyārā bhārat ho

ulfat kā sar meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

ai bhārat maatā laal tire is daur-e-ḳhizāñ meñ sambhal jaa.eñ

sāñche meñ prem aur uns ke ab sab hindū muslim Dhal jaa.eñ

naġhmoñ se sachchī mohabbat ke duniyā kī fazā.eñ badal jaa.eñ

ye manzar dekh ke ulfat ke aañsū āñkhoñ se nikal jaa.eñ

ulfat kā sar meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

vo mulk hai duniyā se achchhā jo rashk-e-jināñ kahlātā hai

ārām-o-rāhat kī chīzeñ sab jis meñ insāñ paatā hai

ai murlī-dhar kī janm-bhūmī tū saare sukhoñ kī daatā hai

ham terī aan pe marte haiñ to pyārī bhārat-mātā hai

ulfat kā sair meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

bhar bhar ke jām-e-mohabbat ke mai-ḳhāna-dahr meñ ḳhuub piyeñ

gokul meñ nand kā laala ho murlī kī pyārī Ter suneñ

vo naġhme havāoñ meñ gaūñjīñ sote hue jazbe jaag uTheñ

ujḌī huī bastī ko dil kī yuuñ ahl-e-vatan ābād kareñ

ulfat kā sar meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

har shaḳhs ho vajd ke aalam meñ ik dilkash raag laboñ par ho

rūhānī naġhme sun sun kar bedār bashar kā muqaddar ho

āñkhoñ ke sāmne duniyā meñ ik sachche prem kā manzar ho

ik uns-o-mohabbat kā aalam aalam meñ aaj sarāsar ho

ulfat kā sar meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

jalvoñ se husn-e-azal ke ab sab ḳhurd-o-kalāñ pur-nūr raheñ

mai pī ke ishq-e-haqīqī kī ulfat ke nashe meñ chuur raheñ

duniyā meñ rah kar duniyā ke jhagḌoñ se kosoñ duur raheñ

ham pyāre kirshn kī bhagTī meñ sarshār raheñ masrūr raheñ

ulfat kā sair meñ saudā hai jazbāt kā tūfāñ barpā hai

ghar ghar meñ prem kī gañgā ho shā.ir ke dil kī tamannā hai

miT jaen mulk se bughz-o-hasad aur dil mein watan ki izzat ho

daman mein fazaon ke har ja ek amn-o-sukun ki sarwat ho

sine hon pak kudurat se har lab par naghma-e-ulfat ho

firdaus-e-barin ka namuna phir duniya mein pyara bhaarat ho

ulfat ka sar mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai

ai bhaarat mata lal tere is daur-e-KHizan mein sambhal jaen

sanche mein prem aur uns ke ab sab hindu muslim Dhal jaen

naghmon se sachchi mohabbat ke duniya ki fazaen badal jaen

ye manzar dekh ke ulfat ke aansu aankhon se nikal jaen

ulfat ka sar mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai

wo mulk hai duniya se achchha jo rashk-e-jinan kahlata hai

aaram-o-rahat ki chizen sab jis mein insan pata hai

ai murli-dhar ki janm-bhumi tu sare sukhon ki data hai

hum teri aan pe marte hain to pyari bhaarat-mata hai

ulfat ka sair mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai

bhar bhar ke jam-e-mohabbat ke mai-KHana-dahr mein KHub piyen

gokul mein nand ka lala ho murli ki pyari Ter sunen

wo naghme hawaon mein gaunjin sote hue jazbe jag uThen

ujDi hui basti ko dil ki yun ahl-e-watan aabaad karen

ulfat ka sar mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai

har shaKHs ho wajd ke aalam mein ek dilkash rag labon par ho

ruhani naghme sun sun kar bedar bashar ka muqaddar ho

aankhon ke samne duniya mein ek sachche prem ka manzar ho

ek uns-o-mohabbat ka aalam aalam mein aaj sarasar ho

ulfat ka sar mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai

jalwon se husn-e-azal ke ab sab KHurd-o-kalan pur-nur rahen

mai pi ke ishq-e-haqiqi ki ulfat ke nashe mein chur rahen

duniya mein rah kar duniya ke jhagDon se koson dur rahen

hum pyare kirshn ki bhagTi mein sarshaar rahen masrur rahen

ulfat ka sair mein sauda hai jazbaat ka tufan barpa hai

ghar ghar mein prem ki ganga ho shair ke dil ki tamanna hai