shaKH-e-adam

suno ye nazm kabhī nahīñ ho saktī

aur tum jānte ho

jab jazbe adhūre rah jaa.eñ

to zamīneñ banjar ho jaatī haiñ

vaqt guzrā kahāñ

zaḳhm vaise hī abhī riste haiñ

dil bhar aayā us jagah

jahāñ mohabbat nā-mohabbat se milī

jab vajūd ek savāl banā

jab ruuh ne jism kā saath chhoḌ diyā

jab duāoñ meñ tāsīr na rahī

qadam baḌhe to bahut ḳhulūs se the

jānte the ki raah kaThin hai

safar dushvār hai

bas ik aas thī

ki ye safar rā.egāñ to nahīñ

ham akele to nahīñ

hamāre saath chalne kī chaah meñ

hamārā safar bhī hai

magar nahīñ jānte the

ki ham to apne aap se judā ho ga.e

ham na jaan sake

ki miTTī se vo mahak hī uTh ga.ī

jo dil ko dil se milātī hai

so ab tak likhī ga.ī har nazm

nā-mukammal hī to hai

kisī pīr-dānā ne kahā thā

bahut sī nāgavār āvāzeñ

tumhāre dhyān ko bhaTkā.egīñ

magar tum pīchhe muḌ ke mat dekhnā

varna patthar ke ho jāoge

so ai pīr-dānā

maiñ nahīñ dekhtī pīchhe muḌ ke

jab āvāzeñ mere dil ko hadaf banātī haiñ

maiñ jāntī huuñ

ye āvāzeñ mujhe tañg karne ke liye haiñ

ye mujhe roknā chāhtī haiñ aage baḌhne se

duniyā ke har bure maqsad ke aaḌe aatī haiñ

ye āvāzeñ

ye kāñToñ bharī āvāzeñ

jo lahūluhān kar detī haiñ ḳhulūs bhare dil ko

jaise kholtā huā paanī jalā detā hai khaal ko

aise hī jalāyā hai in āvāzoñ ne

duniyā se har ehsās ko

lekin

maiñ ne bachāyā apne sach ko

aur chaltī jā rahī huuñ

sab se alag

sun ke anjān rahne kā amal kuchh itnā āsān to nahīñ

bas ek dīvāngī hai

jo mujhe bechain kiye hue hai

ek ajab sī khoj hai

jo ghuTan ban ga.e haiñ saañs lene ke amal meñ

magar tū kahāñ hai pīr-dānā

to jo rahnumā thā

musībat ke māroñ kā

kahāñ bhaTak rahā hai

to kyā kal yug kī vo ghaḌī aa ga.ī

ki pīr-dānā ko shikār kar le ga.iiñ

nā-gavār āvāzeñ

afsos-sad-afsos

suno ye nazm kabhi nahin ho sakti

aur tum jaante ho

jab jazbe adhure rah jaen

to zaminen banjar ho jati hain

waqt guzra kahan

zaKHm waise hi abhi riste hain

dil bhar aaya us jagah

jahan mohabbat na-mohabbat se mili

jab wajud ek sawal bana

jab ruh ne jism ka sath chhoD diya

jab duaon mein tasir na rahi

qadam baDhe to bahut KHulus se the

jaante the ki rah kaThin hai

safar dushwar hai

bas ek aas thi

ki ye safar raegan to nahin

hum akele to nahin

hamare sath chalne ki chah mein

hamara safar bhi hai

magar nahin jaante the

ki hum to apne aap se juda ho gae

hum na jaan sake

ki miTTi se wo mahak hi uTh gai

jo dil ko dil se milati hai

so ab tak likhi gai har nazm

na-mukammal hi to hai

kisi pir-dana ne kaha tha

bahut si nagawar aawazen

tumhaare dhyan ko bhaTkaegin

magar tum pichhe muD ke mat dekhna

warna patthar ke ho jaoge

so ai pir-dana

main nahin dekhti pichhe muD ke

jab aawazen mere dil ko hadaf banati hain

main jaanti hun

ye aawazen mujhe tang karne ke liye hain

ye mujhe rokna chahti hain aage baDhne se

duniya ke har bure maqsad ke aaDe aati hain

ye aawazen

ye kanTon bhari aawazen

jo lahuluhan kar deti hain KHulus bhare dil ko

jaise kholta hua pani jala deta hai khaal ko

aise hi jalaya hai in aawazon ne

duniya se har ehsas ko

lekin

main ne bachaya apne sach ko

aur chalti ja rahi hun

sab se alag

sun ke anjaan rahne ka amal kuchh itna aasan to nahin

bas ek diwangi hai

jo mujhe bechain kiye hue hai

ek ajab si khoj hai

jo ghuTan ban gae hain sans lene ke amal mein

magar tu kahan hai pir-dana

to jo rahnuma tha

musibat ke maron ka

kahan bhaTak raha hai

to kya kal yug ki wo ghaDi aa gai

ki pir-dana ko shikar kar le gain

na-gawar aawazen

afsos-sad-afsos