sham

tū aa ga.ī shaam

surma.ī vahshat o hazīmat ke saa.e saa.e

maiñ dard-hā-dard ik na.ī nazm bun rahā huuñ

daraḳht āseb-zādgāñ dev-paikarāñ

chahchahe karāheñ

ye paat nauhe pe sīna-kūbī meñ gum azā-dār

shāḳhche barchhiyoñ ke phal

ġhunche zaḳhm nā-āshnā-e-marham

ghane daraḳhtoñ meñ

zamzama-sāz apnī apnī dhunoñ ko tartīb de rahe haiñ

lahakte pattoñ kī tāliyoñ meñ

hinā.ī hāthoñ ke thapthapāne kā lams hai

shāḳhchoñ ke pardoñ se muñh nikāle hue ye ġhunche

kisī ko āvāz de rahe haiñ

nigār-e-nik.hat ne hajla-e-gul kā parda parda diyā hai

vo hoñT āvāz de rahe haiñ

ye buad kyā hai?

hayāt o maut aur shādī o ġham ke silsiloñ

meñ ye buad kyā hai

zarūf o ahvāl ke fasāne meñ sab mazāhir

judā judā haiñ

maiñ apne hone meñ sāneha huuñ ki

vāqi.a huuñ?

jo ek manzar mujhe rulā.e

vahī parinde kī choñch par khil ke chahchahā.e

phir aa ga.ī shaam

surma.ī vahshat o hazīmat ke saa.e saa.e

tu aa gai sham

surmai wahshat o hazimat ke sae sae

main dard-ha-dard ek nai nazm bun raha hun

daraKHt aaseb-zadgan dew-paikaran

chahchahe karahen

ye pat nauhe pe sina-kubi mein gum aza-dar

shaKHche barchhiyon ke phal

ghunche zaKHm na-ashna-e-marham

ghane daraKHton mein

zamzama-saz apni apni dhunon ko tartib de rahe hain

lahakte patton ki taliyon mein

hinai hathon ke thapthapane ka lams hai

shaKHchon ke pardon se munh nikale hue ye ghunche

kisi ko aawaz de rahe hain

nigar-e-nikhat ne hajla-e-gul ka parda parda diya hai

wo honT aawaz de rahe hain

ye buad kya hai?

hayat o maut aur shadi o gham ke silsilon

mein ye buad kya hai

zaruf o ahwal ke fasane mein sab mazahir

juda juda hain

main apne hone mein saneha hun ki

waqia hun?

jo ek manzar mujhe rulae

wahi parinde ki chonch par khil ke chahchahae

phir aa gai sham

surmai wahshat o hazimat ke sae sae