shab-charagh

phir vahī kunj-e-qafas phir vahī tanhā.ī hai

vahī yādoñ kā charāġhāñ vahī ḳhvāboñ kā tilism

vahī sangīt vahī giit vahī ras vahī lai

vahī phūloñ kī qabā mauj-e-mai-e-nāb sā jism

vahī 'āriz vahī āñkheñ vahī zulfeñ ki jinheñ

maiñ kabhī bhuul na paayā thā ki phir yaad aa.e

ḳham-e-abru bhī vahī sāya-e-mizhgāñ bhī vahī

phir vahī lab jinheñ dekho to na dekhā jaa.e

phir vahī shahr-e-tarab ḳhvāb-gah-e-rāmish-o-rang

kaj-kulāhoñ kā vatan zohra-jabīnoñ kā dayār

vahī rauñdī huī rāhoñ kī nashīlī ḳhushbū

jagmagātī huī rātoñ kī fazā-e-sarshār

shabnamistāñ bhī vahī kunj-o-ḳhayābāñ bhī vahī

vahī dariyā kī havā.eñ vahī bāġhoñ kī fazā

le ke phir aa.ī hai vaadī kī vahī raqqāsa

bahke bahke se qadam phuul katarne kī adā

phir jharokoñ meñ koī chāñd utar aayā hai

phir sar-e-parda-e-dar jumbish-e-mizrāb huī

luT gayā naqd-e-sukūñ phir usī āvāz ke saath

zulf kī chhāñv meñ phir shām-e-mai-e-nāb huī

raat phir jhuktī chalī aa.ī hai chupke chupke

phir taqāza hai vahī aao chalo lauT chaleñ

vahī mauhūm sī dahshat vahī mub.ham sā savāl

vahī uljhan ki jo kahnā hai vo kis taur kaheñ

ho ga.e raah ke zarre bhī harīf-e-ġham-e-dil

phir vahī moḌ jahāñ dast-e-hinā.ī chhūTā

giit phir Duub ga.e ḳhvāb ke vīrānoñ meñ

phir luTī bazm-e-tarab sāz-e-tarab phir TuuTā

phir vahī soch ki jiine ke bahāne kyā hoñ

phir vahī fikr ki kab tak ġham-e-rusvā.ī hai

dil-e-pur-ḳhūñ bhī vahī hai vahī saudā-e-vafā

phir vahī kunj-e-qafas phir vahī tanhā.ī hai

phir wahi kunj-e-qafas phir wahi tanhai hai

wahi yaadon ka charaghan wahi KHwabon ka tilism

wahi sangit wahi git wahi ras wahi lai

wahi phulon ki qaba mauj-e-mai-e-nab sa jism

wahi 'ariz wahi aankhen wahi zulfen ki jinhen

main kabhi bhul na paya tha ki phir yaad aae

KHam-e-abru bhi wahi saya-e-mizhgan bhi wahi

phir wahi lab jinhen dekho to na dekha jae

phir wahi shahr-e-tarab KHwab-gah-e-ramish-o-rang

kaj-kulahon ka watan zohra-jabinon ka dayar

wahi raundi hui rahon ki nashili KHushbu

jagmagati hui raaton ki faza-e-sarshaar

shabnamistan bhi wahi kunj-o-KHayaban bhi wahi

wahi dariya ki hawaen wahi baghon ki faza

le ke phir aai hai wadi ki wahi raqqasa

bahke bahke se qadam phul katarne ki ada

phir jharokon mein koi chand utar aaya hai

phir sar-e-parda-e-dar jumbish-e-mizrab hui

luT gaya naqd-e-sukun phir usi aawaz ke sath

zulf ki chhanw mein phir sham-e-mai-e-nab hui

raat phir jhukti chali aai hai chupke chupke

phir taqaza hai wahi aao chalo lauT chalen

wahi mauhum si dahshat wahi mubham sa sawal

wahi uljhan ki jo kahna hai wo kis taur kahen

ho gae rah ke zarre bhi harif-e-gham-e-dil

phir wahi moD jahan dast-e-hinai chhuTa

git phir Dub gae KHwab ke viranon mein

phir luTi bazm-e-tarab saz-e-tarab phir TuTa

phir wahi soch ki jine ke bahane kya hon

phir wahi fikr ki kab tak gham-e-ruswai hai

dil-e-pur-KHun bhi wahi hai wahi sauda-e-wafa

phir wahi kunj-e-qafas phir wahi tanhai hai