شب وعدہ شب وعدہ

شب وعدہ نہ تم آئے

نہ مے چھلکی نگاہوں کی

نہ امرت کے حسیں پیالے سے

ہونٹوں نے عطائے زندگی پائی

نہ زلف عنبریں بکھری سر بالیں

شب وعدہ جو یوں آئی

متاع رائیگاں لائی

شب وعدہ

نہ خلوت خانۂ شب میں

بدن کی دھیمی دھیمی آنچ سے

آتش کدے دہکے

نہ سرگوشی کے دھیمے دھیمے سر میں

تم نے باتیں کیں

نہ مدہوشی میں پنجم سر لگا کر

جسم و جاں حرف و زباں بہکے

ہر اک پل خالی خالی

دل کی ہر دھڑکن سوالی تھی

شب وعدہ

شب وعدہ

نہ ڈھلتی رات کی

پاگل ہواؤں نے

پہن کر نقرئی پائل

سر دیوار و در

شوخی سے دستک دی

نہ وحشی راگنی چھیڑی

شب وعدہ

نہ سازندوں نے فطرت کے

بسنتی رت کے صحراؤں میں پنہاں

ساز چھیڑے اور سماں باندھا

زمیں خاموش تھی

تو گنبد گردوں فسردہ تھا

ہر اک احساس مردہ تھا

شب وعدہ

نہ پھلواری کے روئے شبنمیں سے

رنگ و نکہت کے بھنور اٹھے

نہ جوہی کی مہکتی دل ربا سانسیں

تمہارے ہر بن مو سے نکلتی

نرم خوشبوؤں کے جھونکوں سے لپٹ کر

میرے پاس آئیں

شب وعدہ

ہوا تو بس ہوا اتنا

صنوبر کے سیہ پتوں کے دامن سے

لرزتا بے حیا بیمار سا

مہتاب نکلا تھا

شب وعدہ

شب وعدہ