shahid-e-watan

dekhiye in jiine vāloñ kā nishān-e-zindagī

dekhiye in marne vāloñ kā jahān-e-zindagī

dekhiye in pastiyoñ meñ āsmān-e-zindagī

dekhiye in ḳhaak ke zarroñ kī shān-e-zindagī

baiThiye dam-bhar shahīdān-e-vatan kī ḳhaak par

dekhiye rūh-e-vafā kyā kyā ubhartī hai yahāñ

dekhiye hubb-e-vatan dil meñ utartī hai yahāñ

dekhiye dil kī fazā kaisī nikhartī hai yahāñ

dekhiye rahmat ḳhudā kī tauf kartī hai yahāñ

baiThiye dam-bhar shahīdān-e-vatan kī ḳhaak par

is jagah be-rañgiyāñ bhī ālam-e-tasvīr haiñ

is jagah tārīkiyāñ bhī sham.a kī tanvīr haiñ

is jagah ḳhāmoshiyāñ bhī ik lab-e-taqrīr haiñ

is jagah rūposhiyāñ bhī dil kī dāman-gīr haiñ

baiThiye dam-bhar shahīdān-e-vatan kī ḳhaak par

uTh ga.e duniyā se lekin ek duniyā ho ga.e

bulbule paanī ke the TuuTe to dariyā ho ga.e

ye vo the zarrāt jo uḌ kar surayyā ho ga.e

ye vo the bīmār jo mar kar masīhā ho ga.e

baiThe dam-bhar shahīdān-e-vatan kī ḳhaak par

dil ke ujḌe baaġh ko ābād hote dekhiye

ruuh kī afsurdagī ko shaad hote dekhiye

bandagī ko qaid se āzād hote dekhiye

par-shikasta said ko sayyād hote dekhiye

baiThiye dam-bhar shahīdān-e-vatan kī ḳhaak par

aa.iye us ḳhaak se kasb-e-fazīlat kījiye

aa.iye qurbān us par dil kī daulat kījiye

haañ zarā ruk jā.iye itnī na ujlat kījiye

is ziyārat-gāh-e-ālam kī ziyārat kījiye

baiThiye dam-bhar shahīdān-e-vatan kī ḳhaak par

dekhiye in jine walon ka nishan-e-zindagi

dekhiye in marne walon ka jahan-e-zindagi

dekhiye in pastiyon mein aasman-e-zindagi

dekhiye in KHak ke zarron ki shan-e-zindagi

baiThiye dam-bhar shahidan-e-watan ki KHak par

dekhiye ruh-e-wafa kya kya ubharti hai yahan

dekhiye hubb-e-watan dil mein utarti hai yahan

dekhiye dil ki faza kaisi nikharti hai yahan

dekhiye rahmat KHuda ki tauf karti hai yahan

baiThiye dam-bhar shahidan-e-watan ki KHak par

is jagah be-rangiyan bhi aalam-e-taswir hain

is jagah tarikiyan bhi shama ki tanwir hain

is jagah KHamoshiyan bhi ek lab-e-taqrir hain

is jagah ruposhiyan bhi dil ki daman-gir hain

baiThiye dam-bhar shahidan-e-watan ki KHak par

uTh gae duniya se lekin ek duniya ho gae

bulbule pani ke the TuTe to dariya ho gae

ye wo the zarraat jo uD kar surayya ho gae

ye wo the bimar jo mar kar masiha ho gae

baiThe dam-bhar shahidan-e-watan ki KHak par

dil ke ujDe bagh ko aabaad hote dekhiye

ruh ki afsurdagi ko shad hote dekhiye

bandagi ko qaid se aazad hote dekhiye

par-shikasta said ko sayyaad hote dekhiye

baiThiye dam-bhar shahidan-e-watan ki KHak par

aaiye us KHak se kasb-e-fazilat kijiye

aaiye qurban us par dil ki daulat kijiye

han zara ruk jaiye itni na ujlat kijiye

is ziyarat-gah-e-alam ki ziyarat kijiye

baiThiye dam-bhar shahidan-e-watan ki KHak par