shahr-badar

shaam kā piñjra mere jism pe gir jaatā hai

aur maiñ darja dom kā qaidī

dushman ke aḳhbār se puurī duniyā ke logoñ kī bigaḌtī shakleñ dekhne lagtā huuñ

aur sūraj kī āzādī

mere jiine kī ḳhvāhish ko apnā dost banāne aa jaatī hai

mere nāshte ke bartan meñ merī mohabbat ke barsoñ kā saarā zā.iqa bhar jaatā hai

cigarette ke har kash se dariyā khīñch aate haiñ

aur parinde apnī aulādoñ ko mere giit kā chogā dete haiñ

jab mere paañv un ke banā.e zābtoñ kī daldal meñ dhañs jaate haiñ

merī āñkheñ lākhoñ miil safar kar jaatī haiñ

aur mere baazū rail kī donoñ paTriyāñ ban kar phailte haiñ

jab merī ragoñ meñ shā.erī ḳhuun banātī hai

maiñ shaam kā piñjra toḌ ke bāhar aa jaatā huuñ

mere paañv ke sab rishte ik duuje se juḌ jaate haiñ

mere lafz daraḳhtoñ ke gumbad meñ kabūtar ban ke gaTalne lagte haiñ

meñ apne sirhāne baiThe neruda se kuchh bāteñ pūchhtā huuñ

sham ka pinjra mere jism pe gir jata hai

aur main darja dom ka qaidi

dushman ke aKHbar se puri duniya ke logon ki bigaDti shaklen dekhne lagta hun

aur suraj ki aazadi

mere jine ki KHwahish ko apna dost banane aa jati hai

mere nashte ke bartan mein meri mohabbat ke barson ka sara zaiqa bhar jata hai

cigarette ke har kash se dariya khinch aate hain

aur parinde apni auladon ko mere git ka choga dete hain

jab mere panw un ke banae zabton ki daldal mein dhans jate hain

meri aankhen lakhon mil safar kar jati hain

aur mere bazu rail ki donon paTriyan ban kar phailte hain

jab meri ragon mein shaeri KHun banati hai

main sham ka pinjra toD ke bahar aa jata hun

mere panw ke sab rishte ek duje se juD jate hain

mere lafz daraKHton ke gumbad mein kabutar ban ke gaTalne lagte hain

mein apne sirhane baiThe neruda se kuchh baaten puchhta hun