sham-e-rah-guzar

ziist be-iḳhtiyār guzrī hai

juuñ nasīm-e-bahār guzrī hai

dil meñ barpā qayāmateñ kartī

nigah-e-sharmsār guzrī hai

sāġhar o saaz duur hī rakhiye

varna yuuñ bhī bahār guzrī hai

zamzama-sanj o zarfishāñ nik.hat

phir sabā par savār guzrī hai

kyā guzargāh hai mohabbat kī

ḳhud-ba-ḳhud baar baar guzrī hai

ik dur-e-shahvār-e-sad-bustāñ

phir lab-e-jūebār guzrī hai

haa.e shīrīnī-e-lab-e-lālīñ

muskurātī bahār guzrī hai

vaa.e tūfān-e-sīna-e-sīmīñ

duḳhtar-e-kohsār guzrī hai

zindagī kī jamīl rāhoñ se

ḳhud ajal sharmsār guzrī hai

zist be-iKHtiyar guzri hai

jun nasim-e-bahaar guzri hai

dil mein barpa qayamaten karti

nigah-e-sharmsar guzri hai

saghar o saz dur hi rakhiye

warna yun bhi bahaar guzri hai

zamzama-sanj o zarfishan nikhat

phir saba par sawar guzri hai

kya guzargah hai mohabbat ki

KHud-ba-KHud bar bar guzri hai

ek dur-e-shahwar-e-sad-bustan

phir lab-e-juebar guzri hai

hae shirini-e-lab-e-lalin

muskuraati bahaar guzri hai

wae tufan-e-sina-e-simin

duKHtar-e-kohsar guzri hai

zindagi ki jamil rahon se

KHud ajal sharmsar guzri hai