sharabi

ye mai-kada hai tirā aur maiñ sharābī huuñ

sambhāl sāqiyā miinā ko apne hāthoñ meñ

mujhe bhī aaj ma-e-arġhavāñ kī hājat hai

sarak rahe haiñ ruḳh-e-kā.enāt se parde

dil-o-dimāġh meñ ik raushnī sī dar aa.ī

har ek ghūñT pe kuchh zindagī ke raaz khule

muhīt ho ga.ī kaun-o-makāñ kī gīrā.ī

magar ye jaam ke andar bhī kaisī tārīkī

bahut hī talḳh hai apnā ḳhumār-e-bāda-kashī

kahīñ charāġh bujhā jal uThe kahīñ fānūs

vahī tazād vahī hai kashākash-e-hastī

hayāt aaj kahāñ khīñch kar mujhe laa.ī

sambhāl sāqiyā miinā ko apne hāthoñ meñ

hayāt ke liye koī sharāb hai ki nahīñ

bas ek baar to aisī pilā de ai saaqī

ki hosh aa na sake tere piine vaale ko

ye mai-kada hai tera aur main sharabi hun

sambhaal saqiya mina ko apne hathon mein

mujhe bhi aaj ma-e-arghawan ki hajat hai

sarak rahe hain ruKH-e-kaenat se parde

dil-o-dimagh mein ek raushni si dar aai

har ek ghunT pe kuchh zindagi ke raaz khule

muhit ho gai kaun-o-makan ki girai

magar ye jam ke andar bhi kaisi tariki

bahut hi talKH hai apna KHumar-e-baada-kashi

kahin charagh bujha jal uThe kahin fanus

wahi tazad wahi hai kashakash-e-hasti

hayat aaj kahan khinch kar mujhe lai

sambhaal saqiya mina ko apne hathon mein

hayat ke liye koi sharab hai ki nahin

bas ek bar to aisi pila de ai saqi

ki hosh aa na sake tere pine wale ko