شیل شاکڈ

کان کے پاس سے نکلی گولی

ذہن کے اندر ٹھہر گئی ہے

کان کے پردے پر اک چوں کا لمبا پردہ پڑا ہوا ہے

بچوں کے ہنسنے کی کھن کھن

موسم کے پازیب کی چھن چھن

چیخ ہو کوئی یا پھر سسکی

اس پردے پر ہی ہے ٹھٹھکی

یعنی کوئی لفظ کوئی آواز میرے اندر آ کر اب

ڈھونڈھ نہیں سکتی اپنی لے

مجھ میں کہیں نہیں اب وہ شے

بم کا دھواں تو بم پھٹنے کے کچھ ہی دیر میں ہوا ہوا تھا

لیکن اس کی چمک آنکھ پر ٹھہری ہوئی ہے

بینائی پہ جیسے کوئی ورق چڑھا ہے چاندی کا

صبح صبح کوئی پھول کھلے

یا دیر رات ایک فلم چلے

یا تم آ جاؤ شام ڈھلے کچھ بھی دیکھ نہیں سکتا میں

مجھ کو دیکھو

اور بتاؤ

جیتے ہوئے لشکر کے سپاہی

ایسے کیسے ہو جاتے ہیں؟