shikwa

kyoñ na apnī hastī-e-nāshād kā shikvā karūñ

ranj-o-ġham ghere hoñ jab mujh ko to maiñ bhī kyā karūñ

merī qismat meñ likhī hai ḳhār-e-sahrā kī ḳhalish

kis tavaqqo par tamannā-e-gul-e-rā.anā karūñ

sabr kā phal log kahte haiñ milegā ek din

aah kab tak intizār-e-va.ada-e-fardā karūñ

kaun kartā hai mudāvā ḳhātir-e-nāshād kā

apnī mahrūmī kā kis ke sāmne charchā karūñ

dil ke dāġhoñ ko samajh luuñ kis tarah gulhā-e-tar

ġham se kaise sāz-o-sāmān-e-ḳhushī paidā karūñ

gardish-e-daurāñ se kah do is pe maiñ raazī nahīñ

chand saa.at muskurā kar umr-bhar royā karūñ

maiñ azal se darmiyān-e-ranj-o-rāhat huuñ asiir

ġham ko apnā.ūñ ki rāhat ko karūñ to kyā karūñ

ek muddat se pareshāñ ḳhātir-e-nāshād hai

sochtā huuñ pāra-hā-e-dil ko phir yakjā karūñ

ek hālat par kabhī rahtā nahīñ mujh ko qarār

har sukūñ ke baa'd ye hai aarzū taḌpā karūñ

vo sukūn-e-mustaqil hai ye hai paiham iztirāb

zindagānī kā gila yā maut kā shikvā karūñ

kyon na apni hasti-e-nashad ka shikwa karun

ranj-o-gham ghere hon jab mujh ko to main bhi kya karun

meri qismat mein likhi hai KHar-e-sahra ki KHalish

kis tawaqqo par tamanna-e-gul-e-raana karun

sabr ka phal log kahte hain milega ek din

aah kab tak intizar-e-wada-e-farda karun

kaun karta hai mudawa KHatir-e-nashad ka

apni mahrumi ka kis ke samne charcha karun

dil ke daghon ko samajh lun kis tarah gulha-e-tar

gham se kaise saz-o-saman-e-KHushi paida karun

gardish-e-dauran se kah do is pe main raazi nahin

chand saat muskura kar umr-bhar roya karun

main azal se darmiyan-e-ranj-o-rahat hun asir

gham ko apnaun ki rahat ko karun to kya karun

ek muddat se pareshan KHatir-e-nashad hai

sochta hun para-ha-e-dil ko phir yakja karun

ek haalat par kabhi rahta nahin mujh ko qarar

har sukun ke ba'd ye hai aarzu taDpa karun

wo sukun-e-mustaqil hai ye hai paiham iztirab

zindagani ka gila ya maut ka shikwa karun