sip

sapnoñ ke mahakte āñgan meñ

kirneñ na bikhreñ chāhat kī

ḳhushbū ne aañkh kahāñ kholī

suunī haiñ bāñheñ qurbat kī

lajjā ke komal adhroñ se

kab milan huā do shabdoñ kā

kab man-sāgar meñ jvaar uThā

kab chandā pighlā sāñsoñ kā

kab titlī ne kaliyoñ kā ras

pī kar tan kā shringār kiyā

kab jaagī āñkhoñ kī bhāshā

kab chāhat ko ādhār kiyā

kab barkhā barsī va.adoñ kī

kab aashā kā āñchal bhīgā

kab phuul khile kab shāḳh jhukī

kab huā basantī tan giilā

kab shāḳh pe dhaḌkan kī phūTā

ankur qasmoñ ke mausam kā

kab gūñjā dil kī bastī meñ

sur indr-dhanush kī sargam kā

kitne sāvan kitne bhādo

jal ga.e samay kī agnī meñ

kab niim meñ mīThe aam lage

kab patthar pighlā paanī meñ

sadiyoñ se ab tak zinda hai

dhartī se ambar kī duurī

har siine par ankit niklī

andhī rasmoñ kī majbūrī

har aañkh meñ patjhaḌ kā mausam

har jism chitā kī raakh huā

chāñdī sonā be-mol bike

koī na sachchī saakh huā

kis ko apnā mānūñ āḳhir

kis mukh par apnā naam likhūñ

ye jīvan ik korā kāġhaz

ab kis ko kyā paiġhām likhūñ

champa.ī laal niile piile

jo rang bhī dil ko bhāte haiñ

sab pal do pal kā saaya haiñ

sab miTTī meñ mil jaate haiñ

kuchh jīvan banjar dhartī par

be-maqsad jiite rahte haiñ

aur pyaas nahīñ bujhtī un kī

bas aañsū piite rahte haiñ

aashā be-nām sadāqat hai

sonā miTTī ho jaatā hai

jo bhī miltā hai duniyā meñ

āḳhir ik din kho jaatā hai

sapnon ke mahakte aangan mein

kirnen na bikhren chahat ki

KHushbu ne aankh kahan kholi

suni hain banhen qurbat ki

lajja ke komal adhron se

kab milan hua do shabdon ka

kab man-sagar mein jwar uTha

kab chanda pighla sanson ka

kab titli ne kaliyon ka ras

pi kar tan ka shringar kiya

kab jagi aankhon ki bhasha

kab chahat ko aadhaar kiya

kab barkha barsi wadon ki

kab aasha ka aanchal bhiga

kab phul khile kab shaKH jhuki

kab hua basanti tan gila

kab shaKH pe dhaDkan ki phuTa

ankur qasmon ke mausam ka

kab gunja dil ki basti mein

sur indr-dhanush ki sargam ka

kitne sawan kitne bhado

jal gae samay ki agni mein

kab nim mein miThe aam lage

kab patthar pighla pani mein

sadiyon se ab tak zinda hai

dharti se ambar ki duri

har sine par ankit nikli

andhi rasmon ki majburi

har aankh mein patjhaD ka mausam

har jism chita ki rakh hua

chandi sona be-mol bike

koi na sachchi sakh hua

kis ko apna manun aaKHir

kis mukh par apna nam likhun

ye jiwan ek kora kaghaz

ab kis ko kya paigham likhun

champai lal nile pile

jo rang bhi dil ko bhate hain

sab pal do pal ka saya hain

sab miTTi mein mil jate hain

kuchh jiwan banjar dharti par

be-maqsad jite rahte hain

aur pyas nahin bujhti un ki

bas aansu pite rahte hain

aasha be-nam sadaqat hai

sona miTTi ho jata hai

jo bhi milta hai duniya mein

aaKHir ek din kho jata hai