sisakti mazlumiyat ke nam

ajab fazā hai

ajab udāsī

ajiib vahshat baras rahī hai

ajab hai ḳhauf-o-hirās har-sū

ajiib dahshat baras rahī hai

ajab ghuTan hai ajab ta.affun

maiñ kis jagah kis dayār meñ huuñ

ki jaise maqtal meñ aa gayā huuñ

maiñ qātiloñ ke hisār meñ huuñ

phaTī phaTī sī ye surḳh āñkheñ

sunahre ḳhvāboñ ko ro rahī haiñ

gunāh kaise hue haiñ sarzad

ye kin azāboñ ko ro rahī haiñ

ajab tarah kā ye imtihāñ hai

ġham-o-alam kā ye ik jahāñ hai

lahū se tahrīr dāstāñ hai

jarāhatoñ ke javān siine figār kyuuñ haiñ

ye bachche būḌhe shikār kyuuñ haiñ

javān lāshoñ pe bain kartī huī ye maa.eñ

ghuTī ghuTī sī ye siskiyāñ aur sitam ke māroñ kī ye sadā.eñ

lahū kā sadqa utārtī haiñ

falak kī jānib nazar uThā.e na jaane kis ko pukārtī haiñ

ye be-gharī hai nasīb kis kā

ye kaun ḳhemoñ meñ ro rahā hai

mizāj badlā hai āsmāñ ne

ki jo na honā thā ho rahā hai

savāl kartī hai ādamiyat

ye intihā par junūn kyuuñ hai

ki āstīnoñ pe qātiloñ kī

ye be-gunāhoñ kā ḳhuun kyuuñ hai

ḳhamosh haiñ ab

lahū ko paanī banāne vaale

haqīqatoñ ko bhī ik kahānī batāne vaale

sadāqatoñ ko chhupāne vaale

unheñ batāo ki ye ra.ūnat nahīñ rahegī

ye taaj sar par nahīñ raheñge

ye jāh-o-hashmat nahīñ rahegī

sahar ke imkān ho rahe haiñ

ye shab ye zulmat nahīñ rahegī

ajab faza hai

ajab udasi

ajib wahshat baras rahi hai

ajab hai KHauf-o-hiras har-su

ajib dahshat baras rahi hai

ajab ghuTan hai ajab taffun

main kis jagah kis dayar mein hun

ki jaise maqtal mein aa gaya hun

main qatilon ke hisar mein hun

phaTi phaTi si ye surKH aankhen

sunahre KHwabon ko ro rahi hain

gunah kaise hue hain sarzad

ye kin azabon ko ro rahi hain

ajab tarah ka ye imtihan hai

gham-o-alam ka ye ek jahan hai

lahu se tahrir dastan hai

jarahaton ke jawan sine figar kyun hain

ye bachche buDhe shikar kyun hain

jawan lashon pe bain karti hui ye maen

ghuTi ghuTi si ye siskiyan aur sitam ke maron ki ye sadaen

lahu ka sadqa utarti hain

falak ki jaanib nazar uThae na jaane kis ko pukarti hain

ye be-ghari hai nasib kis ka

ye kaun KHemon mein ro raha hai

mizaj badla hai aasman ne

ki jo na hona tha ho raha hai

sawal karti hai aadamiyat

ye intiha par junun kyun hai

ki aastinon pe qatilon ki

ye be-gunahon ka KHun kyun hai

KHamosh hain ab

lahu ko pani banane wale

haqiqaton ko bhi ek kahani batane wale

sadaqaton ko chhupane wale

unhen batao ki ye raunat nahin rahegi

ye taj sar par nahin rahenge

ye jah-o-hashmat nahin rahegi

sahar ke imkan ho rahe hain

ye shab ye zulmat nahin rahegi