سن لو ایک کہانی بچو

سن لو ایک کہانی بچو سن لو ایک کہانی

تین برس کی اک بچی ہے نام ہے جس کا پونم

لیکن سب بچوں نے اس کا نام رکھا ہے رانی

سن لو ایک کہانی بچو سن لو ایک کہانی

اس کے سر کی ٹوپی لال ہے بوٹ ہیں اس کے کالے

کوٹ ہے اس کا رنگ برنگا کرتا اس کا دھانی

سن لو ایک کہانی بچو سن لو ایک کہانی

بسکٹ کے دھوکے میں رانی کھا جاتی ہے روٹی

دودھ کے دھوکے میں وہ اکثر پی جاتی ہے پانی

سن لو ایک کہانی بچو سن لو ایک کہانی

چھیڑتی ہے وہ ہر اک شے کو جو بھی سامنے آئے

ریڈیو ہو یا ہیٹر ہو یا ہو وہ چینی دانی

سن لو ایک کہانی بچو سن لو ایک کہانی

ممی اس کو ڈانٹ پلائے یا دیدی دھمکائے

کہتی ہے کہنا مانوں گی کرتی ہے من مانی

سن لو ایک کہانی بچو سن لو ایک کہانی

تب تک سوتی ہی نہیں ہرگز دیر ہو چاہے کتنی

یہ ہر رات کو سن نہیں لیتی جب تک ایک کہانی

سن لو ایک کہانی بچو سن لو ایک کہانی

چوہے اور بلی کی لڑائی سوداگر اور بندر

ننھے منے قصے اس کو سب ہی یاد زبانی

سن لو ایک کہانی بچو سن لو ایک کہانی

اک دن جھولا جھول رہی تھی اپنے گھر کے باہر

ٹوٹ گئی جھولے کی رسی نیچے گر گئی رانی

سن لو ایک کہانی بچو سن لو ایک کہانی

گرتے ہی وہ زور سے روئی چیخی اور چلائی

لت پت ہو گئی نیچے تھی کچھ کیچڑ اور کچھ پانی

سن لو ایک کہانی بچو سن لو ایک کہانی

روتی روتی گھر میں آئی سب نے ہنسی اڑائی

کیچڑ میں سب ڈوب چکا تھا اس کا کرتا دھانی

سن لو ایک کہانی بچو سن لو ایک کہانی

پہلے تو بے چاری سمجھی ہمدردی کچھ ہوگی

سب کا ہنسنا برا لگا تو زور سے روئی رانی

سن لو ایک کہانی بچو سن لو ایک کہانی

تھوڑی دیر میں سوکھ گئے سب اس کے گیلے کپڑے

کپڑے جب سوکھے تو بھاگی پھر جھولے کو رانی

سن لو ایک کہانی بچو سن لو ایک کہانی

اب کے بچو غور سے تم جھولے کو دیکھتے رہنا

پھر نہ کہیں جھولے سے کیچڑ میں گر جائے رانی

اور سنائی ہے جو ہم نے تم کو ایک کہانی

پھر یہ ہم کو ساری کی ساری نہ پڑے دہرانی

سن لو ایک کہانی بچو سن لو ایک کہانی