suraj ka karb

kyā koī din aisā bhī aayā hai jab sūraj ne

is dhartī par rahne vaale insānoñ meñ

bhed kiyā ho

apnī kirneñ ik maz.hab ke

ik jaatī ke

ik firqe ke

logoñ meñ phailā dī hoñ

kyā koī din aisā bhī aayā hai jab sūraj ne

bārish ke mausam meñ

bhīge jismoñ ko apnī bāhoñ meñ lene se inkār kiyā ho

kaale rangoñ vaale chehre noch liye hoñ

kyā koī din aisā bhī aayā hai jab sūraj ne

ūñche ūñche mahloñ meñ ārām kiyā ho

jhoñpaḌ-paTTī meñ rahne vāloñ ko badnām kiyā ho

shāyad aisā din aane se pahle sūraj apnī āñkheñ

vīrāne meñ pheñk aa.egā

aur apnī

āñkhoñ ke halqoñ meñ

patthar rakh legā

lekin is dhartī par rahne vaale insānoñ ne

mānavtā kā qatl kiyā hai

dharmoñ kā apmān kiyā hai

nafrat kā e'lān kiyā hai

insānoñ ne insānoñ par zulm kiye haiñ

nanhe nanhe bachchoñ ko nezoñ se zaḳhmī kar ke

un kā ḳhuun piyā hai

kitnī māñgoñ kā siñdūr khurach kar

ḳhvāboñ kī rā'nā.ī se mahrūm kiyā hai

kitne hāthoñ ko mehñdī lagne se pahle hī mā'dūm kiyā hai

kitne hī ghar ke sehnoñ ko

chhoTe chhoTe

ḳhānoñ meñ taqsīm kiyā hai

jhagḌoñ ko taslīm kiyā hai

lekin ab ham is dhartī par

koī zulm na hone deñge

ham ne apne hāthoñ meñ ab

ham ne apne hāthoñ meñ ab

amn kā parcham

thaam liyā hai

pyaar vafā kā

naam liyā hai

kya koi din aisa bhi aaya hai jab suraj ne

is dharti par rahne wale insanon mein

bhed kiya ho

apni kirnen ek mazhab ke

ek jati ke

ek firqe ke

logon mein phaila di hon

kya koi din aisa bhi aaya hai jab suraj ne

barish ke mausam mein

bhige jismon ko apni bahon mein lene se inkar kiya ho

kale rangon wale chehre noch liye hon

kya koi din aisa bhi aaya hai jab suraj ne

unche unche mahlon mein aaram kiya ho

jhonpaD-paTTi mein rahne walon ko badnam kiya ho

shayad aisa din aane se pahle suraj apni aankhen

virane mein phenk aaega

aur apni

aankhon ke halqon mein

patthar rakh lega

lekin is dharti par rahne wale insanon ne

manawta ka qatl kiya hai

dharmon ka apman kiya hai

nafrat ka e'lan kiya hai

insanon ne insanon par zulm kiye hain

nanhe nanhe bachchon ko nezon se zaKHmi kar ke

un ka KHun piya hai

kitni mangon ka sindur khurach kar

KHwabon ki ra'nai se mahrum kiya hai

kitne hathon ko mehndi lagne se pahle hi ma'dum kiya hai

kitne hi ghar ke sehnon ko

chhoTe chhoTe

KHanon mein taqsim kiya hai

jhagDon ko taslim kiya hai

lekin ab hum is dharti par

koi zulm na hone denge

hum ne apne hathon mein ab

hum ne apne hathon mein ab

amn ka parcham

tham liya hai

pyar wafa ka

nam liya hai