tabut mein band hawas

mire saath sāñsoñ kī sūrat

vo tārīḳh ke saare aurāq meñ jāgtā hai

kasāfat-zada nāḳhunoñ kī syringoñ meñ bal khāte bichchhū bhare

mire phephaḌoñ kī tavānā.iyoñ meñ

masā.ib se samjhauta karne

haqīqat ki putliyoñ kā tamāshā samajhne kā sartān dāḳhil kare

mujhe zinda rahne ke aise qarīne sikhātā hai

jin ke sarāboñ meñ apnī hifāzat kī zanjīr pahne

mire paañv raqsāñ rahe

kisht-dar-kisht bohrāñ rahe

Thokaroñ meñ gulistāñ rahe

be-navā kashtiyoñ pe bipharte samundar meñ

chakloñ ke nīlām-ḳhānoñ meñ

bad-baḳht majnūñ pe bhārī sadāqat ke sahrā meñ

ātish-fishāñ naḳhl-hā-e-tamanna tale

gol mezoñ pe TuuTe hue ā.inoñ meñ

ki sundar butoñ kī shafaq shāmoñ meñ

har-sū

havāoñ kī mānind maujūd aafat

mirī uñgliyāñ

aag aur ḳhuun kī reshmī chhatriyāñ kholtī haiñ

maqābir kī be-gosh tārīkiyoñ meñ

mahālik kī paglī havāoñ meñ

cafoñ meñ ghaTiyā tambākū kī mānind sulge hujūmoñ meñ

mahkūm pagDanDiyoñ aur mahsūr saḌkoñ pe kuchle saroñ ke ta.affun meñ

vīrāñ dafātir kī bosīda mezoñ pe ārāsta

surḳh joñkoñ kī dahshat meñ

sabz gole ugalte

siyah āhanī azdahoñ ke hazīmat-zada shor meñ

munhamik jabr ke

apne hāthoñ meñ faulādī darre liye

muhāfiz mirā jāgtā hai

ḳhud apne papoToñ meñ ḳhāshāk hote

tadabbur ke ġharre liye

muhāfiz mirā jāgtā hai

mere sath sanson ki surat

wo tariKH ke sare auraq mein jagta hai

kasafat-zada naKHunon ki syringon mein bal khate bichchhu bhare

mere phephaDon ki tawanaiyon mein

masaib se samjhauta karne

haqiqat ki putliyon ka tamasha samajhne ka sartan daKHil kare

mujhe zinda rahne ke aise qarine sikhata hai

jin ke sarabon mein apni hifazat ki zanjir pahne

mere panw raqsan rahe

kisht-dar-kisht bohran rahe

Thokaron mein gulistan rahe

be-nawa kashtiyon pe bipharte samundar mein

chaklon ke nilam-KHanon mein

bad-baKHt majnun pe bhaari sadaqat ke sahra mein

aatish-fishan naKHl-ha-e-tamanna tale

gol mezon pe TuTe hue aainon mein

ki sundar buton ki shafaq shamon mein

har-su

hawaon ki manind maujud aafat

meri ungliyan

aag aur KHun ki reshmi chhatriyan kholti hain

maqabir ki be-gosh tarikiyon mein

mahaalik ki pagli hawaon mein

cafon mein ghaTiya tambaku ki manind sulge hujumon mein

mahkum pagDanDiyon aur mahsur saDkon pe kuchle saron ke taffun mein

viran dafatir ki bosida mezon pe aarasta

surKH jonkon ki dahshat mein

sabz gole ugalte

siyah aahani azdahon ke hazimat-zada shor mein

munhamik jabr ke

apne hathon mein fauladi darre liye

muhafiz mera jagta hai

KHud apne papoTon mein KHashak hote

tadabbur ke gharre liye

muhafiz mera jagta hai