tabut nagar

mujhe pata bhī na chalā

aur maiñ tābūt-nagar aa gayā

ye itnā mub.ham bhī na thā

tābūt-nagar

jis kī galiyoñ meñ

insān apnī parchhā.iyoñ se kaT jaate haiñ

tābūt nagar ke chaar chob darvāze aur darīche

insānoñ ke muntazir haiñ

jo apne gharoñ meñ dafn haiñ

jab yaḳh-basta havā.eñ Takrātī haiñ un gharoñ se

to ye log apnī badbū-dār saañs

kisī ġhubāre kī tarah apne andar bhar lete haiñ

jab log apnī ḳhāmoshī se uktā jaate haiñ

shor kī talāsh meñ

dīvāroñ ko toḌ kar

bāhar nikal aate haiñ

apne aziim maqsad kī aaḌ meñ

ek dūsre ko daar se laTkāte haiñ

mujhe pata bhī na chalā

aur maiñ tābūt-nagar aa gayā

pichhlī raat

kyūñki har insān kī ek pichhlī raat hotī hai

jab bille rote haiñ

jab ḳhāna-zād makḌī jaalā buntī hai

jis ke markaz meñ chamak uThtā hai chāñd

jab insānoñ ke andar ke jhaaḌ jhankār

un ke kānoñ nathnoñ se

un ke dahan aur maq'ad se

bāhar nikal aate haiñ

jab zahrīle kukurmutte ugte haiñ

un kī shiryānoñ se

jinheñ apnī zarūrat ke mutābiq

vo apne chaugāth par sajāte haiñ

ḳhūbsūrat rangoñ se rangte haiñ

ḳhūbsūrat lafzoñ se Dhak kar

duniyā ke sāmne laate haiñ

pichhlī raat

kisī ne kahā thā

ab is raat kā mātam be-kār hai

vaqt aa chukā hai ki log

apne tābūt se uThā.e jaa.eñ

dho dhulā kar achchhe kapḌe pahnā.e jaa.eñ

na.e sire se dafnā.e jaa.eñ

is kī zarūrat aa chukī hai

ki tārīḳh se logoñ ke nā-jā.ez qabze haTā.e jaa.eñ

to maiñ ne nafī meñ sar hilāyā

ye hamāre ḳhuun meñ hai

ye jarsūme kabhī nahīñ marte

inheñ baar baar jī uThne kī lat hai

inheñ baar baar dafnānā zarūrī ho jaatā hai

aur maiñ mez se uThne vaalā āḳhirī shaḳhs na thā

jise apne tābūt ke andar jaanā thā

na ye āḳhirī baar thā ki mujhe tābūt se bāhar aanā thā

na ye āḳhirī baar thā ki na.e sire se

ek na.e mātam ke saath ek na.e katbe ke saath

mujhe ek na.e tābūt meñ apnā ghar basānā thā

aur mujhe pata bhī na chalā

maiñ tābūt-nagar aa gayā

mujhe pata bhi na chala

aur main tabut-nagar aa gaya

ye itna mubham bhi na tha

tabut-nagar

jis ki galiyon mein

insan apni parchhaiyon se kaT jate hain

tabut nagar ke chaar chob darwaze aur dariche

insanon ke muntazir hain

jo apne gharon mein dafn hain

jab yaKH-basta hawaen Takraati hain un gharon se

to ye log apni badbu-dar sans

kisi ghubare ki tarah apne andar bhar lete hain

jab log apni KHamoshi se ukta jate hain

shor ki talash mein

diwaron ko toD kar

bahar nikal aate hain

apne azim maqsad ki aaD mein

ek dusre ko dar se laTkate hain

mujhe pata bhi na chala

aur main tabut-nagar aa gaya

pichhli raat

kyunki har insan ki ek pichhli raat hoti hai

jab bille rote hain

jab KHana-zad makDi jala bunti hai

jis ke markaz mein chamak uThta hai chand

jab insanon ke andar ke jhaD jhankar

un ke kanon nathnon se

un ke dahan aur maq'ad se

bahar nikal aate hain

jab zahrile kukurmutte ugte hain

un ki shiryanon se

jinhen apni zarurat ke mutabiq

wo apne chaugath par sajate hain

KHubsurat rangon se rangte hain

KHubsurat lafzon se Dhak kar

duniya ke samne late hain

pichhli raat

kisi ne kaha tha

ab is raat ka matam be-kar hai

waqt aa chuka hai ki log

apne tabut se uThae jaen

dho dhula kar achchhe kapDe pahnae jaen

nae sire se dafnae jaen

is ki zarurat aa chuki hai

ki tariKH se logon ke na-jaez qabze haTae jaen

to main ne nafi mein sar hilaya

ye hamare KHun mein hai

ye jarsume kabhi nahin marte

inhen bar bar ji uThne ki lat hai

inhen bar bar dafnana zaruri ho jata hai

aur main mez se uThne wala aaKHiri shaKHs na tha

jise apne tabut ke andar jaana tha

na ye aaKHiri bar tha ki mujhe tabut se bahar aana tha

na ye aaKHiri bar tha ki nae sire se

ek nae matam ke sath ek nae katbe ke sath

mujhe ek nae tabut mein apna ghar basana tha

aur mujhe pata bhi na chala

main tabut-nagar aa gaya