taKHliq-e-aurat

zarroñ meñ jumbish thī koī chhā.ī thī fazā par mad-hoshī

ik niiñd thī har shai par taarī qudrat bhī thī mahv-e-ḳhāmoshī

raushan na sitāre the uupar vīrān falak kī bastī thī

laala na zamīñ par khiltā thā be-rañg nigār-e-hastī thī

aaheñ na laboñ par aatī thiiñ muztar na tanoñ meñ jāneñ thiiñ

dil meñ na umañgeñ uThtī thiiñ jazbāt kī band zabāneñ thiiñ

thā husn taḳhayyul meñ ab tak ḳhil.at na milā thā sūrat kā

betāb nigāheñ thiiñ saarī vā dar na huā thā jannat kā

2

jab roz-e-azal kī sub.h huī ik nuur kā dariyā lahrāyā

fitrat ke uThe parde saare bedār jahān-e-rāz huā

sāhil kā sukūñ dhāre kī taḌap be-tābiyāñ mauj-e-tūfāñ kī

amrit-bharī shabnam ke qatre rañgīniyāñ bāġh-e-rizvāñ kī

phūloñ kī mahak kundan kī damak bijlī ke sharāroñ kī chamkeñ

shaam aur sahar ke hasīñ jalve tāroñ ke tabassum kī jhalkeñ

ḳhallāq-e-zamāñ ne un sab kā sat khīñch ke miTTī par chhiḌkā

tabqāt-e-zamīñ meñ huī halchal ik phuul kañval kā phabak uThā

phir batn se un ke ik devī paidā huī bazm-e-imkāñ meñ

rakkhā gayā naam aurat us kā ḳhushiyāñ huiiñ bāġh-e-rizvāñ meñ

zarron mein jumbish thi koi chhai thi faza par mad-hoshi

ek nind thi har shai par tari qudrat bhi thi mahw-e-KHamoshi

raushan na sitare the upar viran falak ki basti thi

lala na zamin par khilta tha be-rang nigar-e-hasti thi

aahen na labon par aati thin muztar na tanon mein jaanen thin

dil mein na umangen uThti thin jazbaat ki band zabanen thin

tha husn taKHayyul mein ab tak KHilat na mila tha surat ka

betab nigahen thin sari wa dar na hua tha jannat ka

2

jab roz-e-azal ki subh hui ek nur ka dariya lahraya

fitrat ke uThe parde sare bedar jahan-e-raaz hua

sahil ka sukun dhaare ki taDap be-tabiyan mauj-e-tufan ki

amrit-bhari shabnam ke qatre ranginiyan bagh-e-rizwan ki

phulon ki mahak kundan ki damak bijli ke shararon ki chamken

sham aur sahar ke hasin jalwe taron ke tabassum ki jhalken

KHallaq-e-zaman ne un sab ka sat khinch ke miTTi par chhiDka

tabqat-e-zamin mein hui halchal ek phul kanwal ka phabak uTha

phir batn se un ke ek dewi paida hui bazm-e-imkan mein

rakkha gaya nam aurat us ka KHushiyan huin bagh-e-rizwan mein