talash

chand kho.e hue lamhāt ko kartā huuñ talāsh

aur vo milte nahīñ ālam-e-bedārī meñ

ālam-e-ḳhvāb ko kahte haiñ haqīqat ke ḳhilāf

kashmakash sī hai bapā ġhaflat o hushyārī meñ

chand kho.e hue lamhāt ko kartā huuñ talāsh

kabhī shahroñ kabhī qaryoñ kabhī vīrāne meñ

thak ke baiThā huuñ to detā huuñ tasallī dil ko

hoñge mahfūz kisī dil ke siyah-ḳhāne meñ

chand kho.e hue afkār ko kartā huuñ talāsh

jaane mahfūz haiñ vo zehn ke kis kone meñ

mere afkār to haiñ juzv mirī hastī ke

ḳhud bhī maiñ kho sā gayā 'amn' unheñ khone meñ

chand kho.e hue ahbāb ko kartā huuñ talāsh

ālam-e-āb-o-gil ab un kā pata kyā degā

haañ agar had se baḌhā jazba-e-dil ai hamdam

shauq-e-nazzāra unhīñ tak mujhe pahūñchā degā

chand khoe hue lamhat ko karta hun talash

aur wo milte nahin aalam-e-bedari mein

aalam-e-KHwab ko kahte hain haqiqat ke KHilaf

kashmakash si hai bapa ghaflat o hushyari mein

chand khoe hue lamhat ko karta hun talash

kabhi shahron kabhi qaryon kabhi virane mein

thak ke baiTha hun to deta hun tasalli dil ko

honge mahfuz kisi dil ke siyah-KHane mein

chand khoe hue afkar ko karta hun talash

jaane mahfuz hain wo zehn ke kis kone mein

mere afkar to hain juzw meri hasti ke

KHud bhi main kho sa gaya 'amn' unhen khone mein

chand khoe hue ahbab ko karta hun talash

aalam-e-ab-o-gil ab un ka pata kya dega

han agar had se baDha jazba-e-dil ai hamdam

shauq-e-nazzara unhin tak mujhe pahuncha dega