talwar aur qalam

tez sī talvār saada sā qalam

bas yahī do tāqateñ haiñ besh-o-kam

ek hai jangī shujā.at kā nishāñ

ek hai ilmī liyāqat kā nishāñ

aadmī kī zindagī donoñ se hai

qaum kī tābindagī donoñ se hai

jo nahīñ Darte qalam kī maar se

zer karte haiñ unheñ talvār se

jab qalam paatā nahīñ koī sabīl

us ghaḌī talvār hai raushan dalīl

hukmrānī ko qalam darkār hai

amn kī zāmin magar talvār hai

ilm ke maidān meñ 'rāzī' bano

jang ke maidān meñ ġhāzī bano

vaqt par mazmūn likkho zor-dār

vaqt par DaT kar laḌo mardāna-vār

vo paḌhe likkhe jo be-talvār haiñ

un kī saarī Digriyāñ be-kār haiñ

bazm meñ ash.ār ke gauhar mufīd

razm meñ talvār ke jauhar mufīd

aaj tak jo bhī huā hai bā-vaqār

thā koī jarnail yā mazmūñ-nigār

'faiz' ko jitnā qalam se pyaar hai

utnī hī pyārī use talvār hai

tez si talwar sada sa qalam

bas yahi do taqaten hain besh-o-kam

ek hai jangi shujaat ka nishan

ek hai ilmi liyaqat ka nishan

aadmi ki zindagi donon se hai

qaum ki tabindagi donon se hai

jo nahin Darte qalam ki mar se

zer karte hain unhen talwar se

jab qalam pata nahin koi sabil

us ghaDi talwar hai raushan dalil

hukmrani ko qalam darkar hai

amn ki zamin magar talwar hai

ilm ke maidan mein 'raazi' bano

jang ke maidan mein ghazi bano

waqt par mazmun likkho zor-dar

waqt par DaT kar laDo mardana-war

wo paDhe likkhe jo be-talwar hain

un ki sari Digriyan be-kar hain

bazm mein ashaar ke gauhar mufid

razm mein talwar ke jauhar mufid

aaj tak jo bhi hua hai ba-waqar

tha koi jarnail ya mazmun-nigar

'faiz' ko jitna qalam se pyar hai

utni hi pyari use talwar hai