taufiq

dakan ye 'qutb-qulī 'vaj.hī'-o-'valī' kā dakan

dakan ye satvat-e-shāhān 'āsafī' kā dakan

isī zamīñ se sharāre hazār phūTe haiñ

isī falak pe sitāre hazār TuuTe haiñ

ye san'atoñ kī zamīñ 'ilm-o-fan kā gahvāra

chaman adab kā ye she'r-o-suḳhan kā gahvāra

har ek daur meñ ik bā-kamāl hotā hai

hunar meñ aap vo apnī misāl hotā hai

yahīñ pe hazrat-e-'taufīq' ne bhī janm liyā

ufuq se she'r-o-suḳhan ke ik āftāb uThā

vo apne vaqt ke ik bā-kamāl shā'ir the

ġhalat nahīñ jo kahūñ bā-kamāl shā'ir the

ġhazal ko 'momin'-o-'ġhālib' kā bāñkpan de kar

kahī hai nazm bhī 'iqbāl' ke qarīne par

vo ābrū-e-chaman ‘izzat-e-dakan 'taufīq'

bajā hai kahiye agar 'ġhālib'-e-dakan 'taufīq'

dakan ye 'qutb-quli 'wajhi'-o-'wali' ka dakan

dakan ye satwat-e-shahan 'asafi' ka dakan

isi zamin se sharare hazar phuTe hain

isi falak pe sitare hazar TuTe hain

ye san'aton ki zamin 'ilm-o-fan ka gahwara

chaman adab ka ye she'r-o-suKHan ka gahwara

har ek daur mein ek ba-kamal hota hai

hunar mein aap wo apni misal hota hai

yahin pe hazrat-e-'taufiq' ne bhi janm liya

ufuq se she'r-o-suKHan ke ek aaftab uTha

wo apne waqt ke ek ba-kamal sha'ir the

ghalat nahin jo kahun ba-kamal sha'ir the

ghazal ko 'momin'-o-'ghaalib' ka bankpan de kar

kahi hai nazm bhi 'iqbaal' ke qarine par

wo aabru-e-chaman ‘izzat-e-dakan 'taufiq'

baja hai kahiye agar 'ghaalib'-e-dakan 'taufiq'